कोरोना भाइरसको संभावित जोखिमबाट बच्न के गर्ने ? अहिले यसको लागि तीन वटा सुरक्षात्मक उपाय छ । एक, शारीरिक दुरी कायम राख्ने । दुई, मास्क लगाउने । तीन, सेनिटाइजर प्रयोग गर्ने ।
अहिले नेपालमा कोरोना परिक्षण गरिएकामध्ये ५० प्रतिशतको हाराहारीको नतिजा पोजेटिभ आउने गरेको छ । कोभिड-१९ संकट व्यवस्थापन समन्वय केन्द्र (सीसीएमसी)ले कोरोना सङ्क्रमण रोक्नको लागि विभिन्न स्वास्थ्य मापदण्ड लागू गरेको छ ।
उपत्यकामा प्रशासनले सार्वजनिक स्थानमा खोप कार्ड, मास्क, भौतिक दूरी कायम गर्ने तथा सवारी साधनमा जोर बिजोर प्रणाली लागू गर्नुपर्ने लगायतका आदेश जारी गरेको छ । तर, सार्वजनिक स्थानमा प्रशासनका उल्लिखित आदेशको पालना नभएको पनि उत्तिकै देख्न सकिन्छ ।
स्वास्थ्य विज्ञहरुले मास्कको प्रयोगले कोरोना भाइरस सङ्क्रमण हुनबाट जोगाउने भएकाले अनिवार्य रुपमा मास्कको प्रयोग गर्न अनुरोध गरिरहे पनि मानिसको लापरबाही भने कायमै छ ।
आज राजधानीका विभिन्न स्थानमा मास्क लगाएका तर नाक र मुख खुल्ला छाडेर चिउँडोमा मास्क लगाएका मानिसहरू भेटिए ।
भक्तपुरकी प्रमुख जिल्ला अधिकारी (सीडीओ) रुद्रादेवी शर्माले केही दिनअगाडि मास्क लगाउन अटेरी गर्नेलाई ठाउँको ठाउँ कारबाही गरिने बताएकी थिइन् । सीडीओ शर्माले भनिन्, “हामी अहिले जिंगल बजाएर वृद्ध, अशक्तहरुलाई मास्क बाँडिरहेका छौं । सके सम्म स्वतःस्फूर्त रुपमा मास्क लगाउने गरी सकारात्मक बाटोबाटै काम गरिरहेका छौं ।”
संक्रमित व्यक्तिको सासको माध्यामबाट कोरोना भाइरस अर्को व्यक्तिको शरीरमा प्रवेश गर्न सक्छ । भाइरसको प्रवेशद्वार हो, नाक र मुख । त्यसैले नाक र मुखलाई मास्कले ढाकेपछि धेरै हैदसम्म भाइरस प्रवेश गर्न सक्दैन । यही कारण मास्क लगाउन सुझाइएको हो । यो सामान्य ज्ञान अधिकांशमा छ । यद्यपि ज्ञान हुँदाहुँदै पनि उनीहरु मास्क चिउडोमा लगाएर हिँड्छन् । कुराकानी गर्दा मास्क खोल्छन् । भनिन्छ नि, लापरवाहीको औषधि हुन्न । यस्तो लाग्छ, मानौं शरीरको कुनैपनि भागमा मास्क लगाउँदा कोरोना भाग्छ ।
