काठमाडौँको पठाओ नेपाल प्रालिले शनिबार राति कोटेश्वरबाट अपहरणमा परेका पठाओ राइडर २५ वर्षीय प्रवीण राई ‘अफलाइन राइडर’ भएको पठाओले जनाएको छ । सोमबार पठाओका प्रवक्ता तथा मार्केटिङ हेड सुरक्षा हमालले विज्ञप्ती जारी गर्दै अपरणमा परेका राई अफलाइन राइडर भएको जनाएकी हुन् ।
प्रवीणलाई २१ वर्षीय सुमन तामाङ र २६ वर्षीय मीनराज राईले अपहरण गरेका महानगरीय प्रहरी परिसर ललितपुरले जनाएको छ । प्रहरीका अनुसार सुमन कोटेश्वरबाट पठाओमा चढेका थिए ।
उनले राति ११ः३० बजेतिर धापाखेलसम्म छाडिदिन पठाओ राइडरलाई आग्रह गरेका थिए । धापाखेल पुगेपछि सुमन र उनका साथी मीनराज मिलेर प्रविनलाई लुटपाट गरी मुखमा बाक्लो टेप लगाएर हातखुट्टा बाँधेर छाडेका थिए । लगत्तै राइडर राईको बागमती प्रदेश ०२–०१–००१ प ११६६ नम्बरको मोटरसाइकल लिएर उनीहरू भागेका थिए ।
पठाओ अनलाइन राइड सेयरिङ प्लाटफर्म हो । पठाओको सेवा लिन र दिन मोबाइल एपमार्फत बुकिङ गर्न आवश्यक हुन्छ । यसरी सेवा प्रदान गर्दा यात्रा गरिरहेको सवारीको विवरण, सेवाग्राही र राइडर दुबैको ब्यक्तिगत जानकारी तथा यात्रा गरिरहेको स्थानको बिवरण पठाओको एपमा उपलब्ध हुन्छ ।
‘समाचारमा बताइएको घटना भएको समयमा लिइएको राइड पठाओको अनलाइन राइड नभएको देखिन्छ,’ विज्ञप्तिमा भनिएको छ, ‘यस्तो राइड सुरक्षित र सुनिश्चित दुवै नहुने भएकाले अफलाइन राइड लिने र दिने काम नगर्न हामीले बारम्बार सेवाग्राही र राइडर दुवैलाई सुझाउँदै आएका छौँ । पठाओ मोबाइल एपको विवरणअनुसार अपहरण र लुटपाटमा पर्ने ब्यक्ति प्रवीण राईले सो घटना हुनुअगाडि सो दिनमा सामाखुसीदेखि कोटेश्वरसम्म अन्तिम राइड लिएको देखिन्छ । रातको ११ बजेर १८ मिनेट जाँदा सामाखुसीबाट लिएको राइड ११ बजेर ३३ मिनेट जाँदा कोटेश्वरमा टुङ्ग्गिएको छ । कोटेश्वरदेखि घटनास्थल धापाखेल पुगेको कुनै पनि विवरण पठाओ एपमा उपलब्ध छैन ।’