इलामको सूर्योदय नगरपालिका–४ अन्तुमा रहेको अन्तु भ्याली चिया कारखानामा आगलागी हुँदा १३ करोडको क्षति भएको छ ।
उद्योगका सञ्चालक, प्रहरी र स्थानीय जनप्रतिनिधिसहितको टोलीले स्थलगत निरीक्षणपछि सार्वजनिक गरेको प्रतिवेदनमा आइतबार साँझ भएको सो आगलागीबाट कारखानाका भवन, मेसिन औजार र तयारी चिया जलेर नष्ट हुँदा १३ करोड रुपैयाँ क्षति भएको उल्लेख छ ।
इलाका प्रहरी कार्यालय पशुपतिनगरका प्रहरी निरीक्षक देउप्रसाद लिम्बूका अनुसार आगलागीबाट चिया उद्योगमा रहेका दुईवटा ड्रायर मेसिन, पाँचवटा रोलिङ टेबुल, तीनवटा हिटर मेसिन, पाँचवटा सर्टिङ मेसिन र २४ वटा वेदरिङ ट्रफ जलेर नष्ट भएको छ ।
त्यसबाहेक आगलागीबाट उद्योगमा प्रशोधन गरी निर्यातका लागि तयारी अवस्थामा राखिएको ८० हजार किलोभन्दा बढी चिया जलेर नष्ट भएको छ । यस्तै, चिया उद्योगमा आगलागी हुँदा कार्यालय भवन, स्टाफक्वार्टर र जेनेरेटर रुमबाहेक अन्य सबै संरचना जलेर नष्ट भएको छ ।
आगो नियन्त्रणको लागि नेपाल प्रहरी, शसस्त्र प्रहरीले सूर्योदय नगरपालिका, इलाम नगरपालिका, मेचीनगर नगरपालिका, भद्रपुर नगरपालिकाको दमकल प्रयोग गरिएको भएपनि उद्योग पूर्ण रूपमा जलेको छ । विद्युत् सर्ट भएर आगलागि भएको अनुमान प्रहरीले गरेको छ ।