स्वास्थ्य तथा जनसङ्ख्यामन्त्री विरोध खतिवडाले कोभिड–१९ विरुद्ध खोप अभियान उच्च प्राथमिकताका साथ सञ्चालन भइरहेको जानकारी दिएका छन् । सोमबार समाजवादी प्रेस सङ्गठन मोरङले विराटनगरमा गरेकाे पत्रकार भेटघाटमा मन्त्री खतिवडाले यस्तो बताएका हुन् ।
खोप अभियान सातवटै प्रदेशमा तालिका बनाएर अझ प्रभावकारी रूपमा सञ्चालन गर्ने नीति सरकारको रहेको बताउँदै उनले खोपको समस्या नरहेको जनाउँदै अहिले चार करोड डोज खोप रहेको बताए ।
समग्र जनसङ्ख्याका आधारमा ४० प्रतिशत जनताले खोप लगाइसकेको जानकारी दिँदै उनले खोपका लागि अस्थायी डेस्क पनि राखिने बताए । बढी भिडभाड हुने सहरमा नियमित खोप सञ्चालन गर्ने सरकारको तयारी रहेको उल्लेख गर्दै उनले हालसम्म दुई करोड ८० लाख डोज खोप लगाइसकिएको जनाए ।
गत पुस ४ देखि १२ वर्षमाथि र १८ वर्षमुनिका बालबालिकालाई खोप लगाउने कार्य सञ्चालन भइसकेको बताउँदै उनले अहिलेसम्ममा दुई डोज खोप लगाउने नागरिकको प्रतिशत ६० पुगेको बताए ।
सरकार ओमिक्रोनको रोकथाम, उपचार एवं नियन्त्रण गर्नका लागि तयारी गरिसकेको जनाउँदै उनले सरकार होल्डिङ सेन्टर निर्माण गर्ने र अस्पतालमा आइसियू, भेन्टिलेटरको व्यवस्थासँगै धेरै अस्पतालमा अक्सिजन प्लान्ट स्थापना भइसकेको छ बताए ।
