मोरङको पथरीशनिश्चरे नगरपालिकाका एक युवक आफ्नै पत्नीको हत्या गरेको आरोपमा पक्राउ परेका छन् । पक्राउ पर्नेमा पथरीशनिश्चरे–२ बुद्ध चोकका ३३ वर्षीय जय शर्मा रहेको इलाका प्रहरी कार्यालय पथरीले जानकारी दिएको छ ।
आफ्नै पत्नी १९ वर्षीया पूजा विकको हत्या गरेको आरोपमा उनलाई पक्राउ गरिएको पथरी प्रहरी डिएसपी कृष्ण खड्काले केटिएम दैनिकलाई जानकारी दिए । उनका अनुसार गत पुस ३० गते मादक पदार्थ सेवन (मापसे) गरेको विषयलाई लिएर उनीहरूबीच विवाद भएको थियो ।
जयले मापसे गरेर घरमा आएपछि पति–पत्नीबीच विवाद भएको थियो । विवादका क्रममा जयले प्लास्टिकको पाइपले पूजालाई गम्भीर घाइते हुनेगरी कुटपिट गरेका थिए । कुटपिटबाट उनको टाउको र शरीरका विभिन्न भागमा चोट लागेको थियो ।
घाइते पूजालाई उपचारका लागि विराटनगरको नोबेल शिक्षण अस्पतालमा भर्ना गरिएको थियो । तर नोबेलले उपचार सम्भव नभएको भन्दै घर पठाएको थियो । घर लैजाँदै गर्दा शनिबार साँझ उनको बाटैमा पूजाको मृत्यु भएको डिएसपी खड्काले बताए ।
पत्नीको हत्यामा संलग्न जयलाई पक्राउ गरेर घटनाको अनुसन्धान सुरु थालिएको उनको भनाइ छ ।
