साउथको चर्चित जोडी सामन्था रुथ प्रभु र नागा चैतन्यले २०२१ को अक्टोबरमा करीब ४ वर्ष लामो वैवाहिक सम्बन्धलाई पूर्णविराम लगाए । आपसी मतभेदका कारण उनीहरुले वैवाहिक जीवन तोडेको भारतीय मिडियाले दाबी गर्दै आएका छन् । तर, सामन्थासँग डिभोर्स भएदेखि मौन रहेका नागाले हालै एक टिभी इन्टरभ्यूमा एकअर्काको खुसीका लागि आफूहरु अलग भएको बताएका छन् ।
फिल्म ‘बंगारराजु’ को प्रमोशनको क्रममा नागाले भनेका छन्, ‘अलग हुनु एकदम ठिक थियो । यो हामी दुवैको खुसीका लागि सही निर्णय हो । यदी उनी (सामन्था) खुसी छिन् भने म पनि खुसी छु । यसकारण यस्तो स्थितिमा डिभोर्स नै उचित निर्णय हो ।’ केही हप्ताअघि सामन्थाले डिभोर्सको बारेमा आफूले धेरै पटक कुरा गरिसकेकाले अब यो विषयमा दोर्याएर नबोल्ने बताएकी थिइन् ।
सामन्था र नागाले २०१७ अक्टूबर ६ मा १० करोड खर्च गरेर गोवामा विवाह गरेका थिए । विवाहअघि उनीहरु ७ वर्ष प्रेम सम्बन्धमा थिए । यो जोडीको पहिलो भेट फिल्म ‘ये माया चेसावे’ सुटिङ सेटमा भएको थियो । उनीहरुले ‘मजिली, अटोनगर सूर्या, ये माया चेसावे’ लगायतका फिल्ममा एकसाथ काम गरेका छन् । फिल्ममा काम गर्ने समयमा उनीहरुबीच प्रेमको पालुवा पलाएको थियो ।
