पर्सा प्रहरीले शरीरभरि १० किलो चरेस बाँधेर भारत हिँडेकी महिलालाई पक्राउ गरेको छ । बुधबार पर्साको इनर्वा प्रहरी चौकीबाट खटिएको प्रहरी टोलीले रौतहट पिपरीया परोवा नगरपालिका–९ बङ्कुल टोलकी ४२ की रञ्जुदेवी कलवारलाई पक्राउ गरेको हो ।
बुधबार साँझ ७ बजे वीरगञ्ज महानगरपालिका–१६ शङ्कराचार्य गेटमा खटिएको नियमित चेकिङ टोलीले नेपालबाट भारतको रक्सौलतर्फ पैदल गइरहेकी रञ्जुदेवीलाई शङ्का लागेपछि रोकेर जाँच गरेको थियो ।
सोक्रममा रञ्जुदेवीको शरीर खानतलासी गर्दा उनले प्याकेट बनाएर आफ्नो ढाड, खुट्टामा पहेलो रङ्गको कपडाको डोरीले बाँधी अड्काएर राखेको चरेश भेटिएको थियो । यस्तै, उनले लगाएको ज्याकेटको दुवैतर्फको खल्तीमा लुखाइछिपाइ चरेश ल्याएको पाइएको थियो ।
त्यसपछि पक्राउ गरेको टोलीले उनलाई लागुऔषधसम्बन्धी कसूरमा अनुसन्धान अगाडि बढाइएको प्रहरीले जनाएको छ ।