गत कात्तिक १६ गते प्रदेश १ को मुख्यमन्त्री बनेका राजेन्द्रकुमार राईले आफ्नो सम्पत्ति विवरणमा पाँच आनामात्रै जग्गा रहेको उल्लेख गरेका छन् ।
भोजपुरको षडानन्द नगरपालिका–११ झ्याउँपोखरी घ भएका उनको सोही स्थानमा पाँच आना जग्गा रहेको सम्पत्ति विवरणमा उल्लेख छ । सो जग्गा पनि उनको पैत्रिक सम्पत्ति हो ।
तथापि, मुख्यमन्त्री राईसँग बैङ्कमा भने ८७ लाख रुपैयाँ छ । कृषि विकास बैङ्कमा १७ लाख २० हजार रुपैयाँ र वाणिज्य बैङ्कमा दुई लाख ६५ हजार रुपैयाँ उनको नाममा छ भने पत्नी शोभा पाठकको नाममा सानिमा विकास बैङ्कमा ६७ लाख ७० हजार रुपैयाँ रकम बचत छ ।
राईले दुवै बैङ्कको रकम तलबभत्ताबाट आम्दानी भएको जनाएका छन् । पत्नीको नाममा रहेको रकम भने स्कुलको स्वामित्व हस्तान्तरण र माइती पक्षबाट आएको सम्पत्ति विवरणमा उल्लेख छ ।
राई परिवारमा १० तोला सुन छ भने साथमा एउटा मोटरसाइकल रहेको विवरण पेश गरेका छन् । हालसम्म कुनै पनि सेयर नभरेका राईले आफू ऋणमा पनि नपरेका विवरणमा उल्लेख गरेका छन् ।