अतिरिक्त शुल्क नबुझाउने एमबिबिएसमा भर्ना भएका नयाँ विद्यार्थीलाई कलेज प्रवेशमा रोक लगाएपछि आन्दोलनरत नोबेल मेडिकल कलेज विराटनगरका पीडित विद्यार्थीहरूले बुधबार जिल्ला प्रशासन कार्यालय घेराउ गरेका छन् ।
आज दिउँसो पीडित विद्यार्थी र विभिन्न पाँच विद्यार्थी सङ्गठन जिल्ला प्रशान कार्यालयको मूल गेटमा धर्ना बसेका छन् । नेपाल विद्यार्थी सङ्घ, अनेरास्ववियु, अखिल (क्रान्तिकारी), अनेरास्ववियू, समाजवादी विद्यार्थी यूनियन मोरङ र चिकित्सा शिक्षा विद्यार्थी आन्दोलन सङ्घर्ष अभियानको सहयोगमा पीडित विद्यार्थीहरू नोबेल मेडिकलमा रिले अनशन र प्रशासनमा धर्नामा बसेका हुन् ।
साथै विद्यार्थीले बुधबारदेखि कलेज प्रशासनमा तालासमेत लगाएका छन् । एमबिबिएस शुल्क घटाउन माग गर्दै आन्दोलनरत विद्यार्थी तथा अन्य विद्यार्थी सङ्गठनले मङ्गलबार नोबेलअगाडि टायर बालेर प्रदर्शन गरेका थिए ।
सहमतिविपरीत एमबिबिएस प्रथम वर्षको कक्षा सञ्चालन गरेपछि विद्यार्थीहरूले नोबेलअगाडि केही दिनदेखि लगातार प्रदर्शन गरिरहेका छन् । अतिरिक्त शुल्क नबुझाउने विद्यार्थीलाई प्रवेश नदिई थोरै विद्यार्थीलाई मात्रै राखेर कक्षा सञ्चालन गरेपछि आइतबारबाट विद्यार्थीहरूले प्रदर्शन सुरु गरेका हुन् ।
पुस २२ मा कलेज प्रतिनिधि, विद्यार्थी सङ्गठन र अभिभावकसँग प्रमुख जिल्ला अधिकारीले गरेको बैठकमा चिकित्सा शिक्षा आयोगले निर्धारण गरेको शुल्कभन्दा अतिरिक्त शुल्क नलिने गरी पुस २५ गतेदेखि कक्षा सञ्चालन गर्ने सहमति भएको थियो ।
एमबिबिएस पहिलो वर्ष (१५औँ) ब्याचमा अध्ययनरत सम्पूर्ण विद्यार्थीलाई समेटेर कक्षा सञ्चालन गराउनुपर्ने र केही सीमित विद्यार्थीलाई राखेर कक्षा सञ्चालन गराउन नपाउने सहमति भएतापनि कलेजले उक्त सहमति तोडेको विद्यार्थीहरूको आरोप छ । सहमतिविपरीत एमबिबिएस प्रथम वर्षको कक्षा सञ्चालन गरेपछि विद्यार्थीहरूले विरोध प्रदर्शनलाइ निरन्तरता दिइरहेका छन् ।
