मोरङको विराटनगर महानगरपालिकाका विद्यालयहरू बिहीबार (भोलि) बाट बन्द हुने भएका छन् । बुधबार सूचना प्रकाशित गर्दै महानगरले पुस २९ गतेबाट माघ १५ गतेसम्म विद्यालय बन्द गर्न निर्देशन दिएको हो ।
महानगरपालिकाले शुक्रबारसम्मको पूर्वनिर्धारित परीक्षा भने सञ्चालन गर्न पाउने बताएको छ । विद्यालयको बर्से र हिउँदे बिदामा कटौती हुने गरी माघ १५ गतेसम्मका लागि बिदा दिन सूचना जारी गरेको महानगरले शुक्रबारसम्मका पूर्वनिर्धारित परीक्षा स्वास्थ्य सुरक्षा मापदण्ड पूरा गरेर सञ्चालन गर्न निर्देशन दिएको छ ।
कोरोना सङ्क्रमणबाट विद्यार्थीलाइ जोगाउने लक्ष्यका साथ सरकारले पुस २७ गतेबाटै विद्यालयहरू बन्द गर्न सर्कुलर गरेको थियो । तर सङ्घीय सरकारले गरेको निणर्यपूर्व नै विद्यालयहरूले परीक्षाको कार्यसूचना प्रकाशित गरेका कारण विद्यालय भोलिबाट बन्द गरिने विराटनगर महानगरपालिकाका शैक्षिक प्रशासन महाशाखा प्रमुख दुर्गाप्रसाद खतिवडाले जानकारी दिए ।