डा. सिके राउत नेतृत्वको जनमत पार्टीका १४ जना कार्यकर्तालाई प्रहरीले सप्तरीका विभिन्न स्थानबाट पक्राउ गरेको छ। हातहातमा लाठी बोकेर बजार तथा यातायात बन्द गर्ने क्रममा उनीहरूलाई प्रहरीले पक्राउ गरेको हो ।
जनमत पार्टीका जिल्ला संयोजक किसान मण्डल, सचिव थानेश्वर साह, कोषाध्यक्ष शम्भुकुमार साह, हनुमाननगर कंकालिनी–१ का संयोजक सुरेन्द्र मण्डल, सुशीलाकुमारी यादव, पंकजकुमार सिन्हा, रामकृष्ण मण्डल, प्रदीपकुमार मण्डल, चन्देश्वर मण्डल, रूपेशकुमार यादव, योगेन्द्र साहसहित १४ जना पक्राउ परेको प्रहरी प्रवक्ता माधवप्रसाद काफ्लेले जानकारी दिए ।
औरही गाँउपालिकाले गहुंको बीउ लुकटेको भन्दै चार जनामाथि मुद्दा दर्ता गराएको र प्रहरीले एक किसानलाई पक्राउ गरेको विरोधमा जनमत पार्टीले आमहड्तालको घोषणा गरेको थियो।
आन्दोलनको अवज्ञा गरेको भन्दै जनमत पार्टीका कार्यकर्ताले चोहर्वामा ट्रकमा आगजनी गरेका छन्। यस्तै राजमार्ग बन्द गराउने जनमतका कार्यकर्ता र प्रहरीबीच ठाउँ ठाउँमा झडप भएको थियो।
उनीहरुले किसानको माग सम्बोधन गर्न उच्चस्तरीय समिति गठन गर्नुपर्ने, समयमा मलखाद र बीउको व्यवस्था गर्नुपर्ने, सिचाइको व्यवस्था र निशुल्क सिचाइ विद्युत दिनुपर्ने, हावाहुरी र वर्षले भएको बालीनाली क्षतिपूर्ति दिनुपर्ने लगायतका माग गरेका थिए ।
कृषि प्रधान देशमा कृषक सँधै मारमा परिरहेको भन्दै उनीहरुले कृषि उपजको उचित सर्मथन मूल्य निर्धारण हुनुपर्ने , किसान कार्डको व्यवस्था गर्नुपर्ने, किसानलाई पेन्सनको व्यवस्था गर्नुपर्ने, स्वतः बाली बीमाको शुनिश्चिता हुनुपर्ने, प्रहरीद्धारा गिरफ्तार गरिएका आन्दोलनकारीहरुलाई तत्काल रिहा गर्नुपर्ने भन्दै नाराबाजी गरेका थिए । आफुहरुको माग पुरा नहुन्जेल आन्दोलन जारी राख्ने उनीहरुको भनाइ छ ।
