एउटा भवनमा एक झ्याल एक मन्त्रालयको बोर्ड झुण्डाएर कीर्तिमान कायम गरेका बागमती प्रदेशका मुख्यमन्त्री राजेन्द्रप्रसाद पाण्डेले १८ करोडको गाडी किन्ने प्रक्रिया अघि बढाएका छन । मुख्यमन्त्री पाण्डेले ८ मन्त्रालय फुटाएर १४ बनाएका छन ।
बागमती प्रदेशको राजधानी हेटौंडा उपमहानगरपालिका–१ चौकीटोल ओरालोस्थित भवनमा पाँच वटा मन्त्रालयका साइनबार्ड देखिन्छन्। श्रम रोजगार तथा यातायात मन्त्रालय, कृषि तथा पशुपन्छी विकास मन्त्रालय, खानेपानी, उर्जा तथा सिंचाइ मन्त्रालय, भौतिक पूर्वाधार विकास मन्त्रालय र भूमि व्यवस्था, सहकारी तथा गरीबी निवारण मन्त्रालय एकै भवनमा छन्।
बाहिरबाट हेर्दा ठूलो भवनमा मन्त्रालयहरूका साइनबोर्ड चिटिक्क पारेर राखिएका देखिन्छन्। भवनभित्र भने काम गर्नै नसकिने अवस्था छ। कतिपय मन्त्रालय त केही कोठामा सीमित छन्। नेकपा (एकीकृत समाजवादी)का नेता पाण्डेको नेतृत्वमा बनेको सरकारमा नेकपा (माओवादी केन्द्र) र नेपाली कांग्रेस सहभागी छन् ।
अहिलेसम्म १२ जना सदस्य रहेको मन्त्रिपरिषद्मा अझै पाँच सदस्य थप्ने तयारी भैरहेको छ । अहिले बस्ने ठाउँनै नभएकाले तीन मन्त्री र दुइ राज्यमन्त्री नियुक्तिको पक्रिया अलमलमा परेको छ । यद्यपी त्यो पनि चाँडै नै हुने पाण्डे निकट स्रोतले जनाएको छ ।
पाण्डेले अब ३० वटा सवारी खरिदका लागि १८ करोड रूपैयाँ खरिद गर्न लागेको अर्थ तथा योजना मन्त्रालयले जनाएको छ । भौतिक पूर्वाधार मन्त्रालयलाई तत्काल दुईवटा सवारी खरिद गर्न १ करोड २० लाख रुपैयाँ दिनेगरी स्रोत सुनिश्चित गरिएको मन्त्रालयले जनाएको छ । अध्ययन र अनुसन्धान बिना नै मन्त्रालय फ्रटाएपछि मन्त्रालय र मन्त्री बस्ने ठाउँको अभाव देखिएको छ ।
बागमती प्रदेशमा मन्त्रालय थपिएपछि आर्थिक भार पनि बढेको छ। मन्त्रालयको व्यवस्थापनमा लाग्ने प्रशासनिक तथा मन्त्रीको सचिवालय, पीए व्यवस्थापन, सल्लाहकार, यातायात, विद्युत्, पानी लगायत विभिन्न सुविधामा खर्च बढेको छ।
आर्थिक भार बढ्ने गरी मुख्यमन्त्री पाण्डे फेरि मन्त्री थप्ने तयारीमा छन्। उनले तीन पटक गरेर ११ मन्त्री र एक राज्यमन्त्री नियुक्त गरिसकेका छन्। फेरि तीन मन्त्री र दुई राज्यमन्त्री नियुक्त गर्ने तयारी भइरहेको एक मन्त्रीले बताए।
पछिल्लो पटक मुख्यमन्त्री राजेन्द्र पाण्डेले गठबन्धनमा सहभागी दललाई भाग पुर्याउन आठ मन्त्रालयलाई टुक्र्याएर १४ बनाएका छन्। मुख्यमन्त्री पाण्डेले एउटै मन्त्रालयलाई तीन वटासम्म बनाएका छन्।