नेपाली कांग्रेसका प्रवक्ता विश्वप्रकाश शर्माले नेता प्रकाशमान सिंहको प्यानलबाट महामन्त्रीमा उम्मेदवारी दर्ता गराएका छन् । पौडेल पक्षबाट सभापतिको साझा उम्मेदवार छनोटमा सहमति नजुटेपछि नेता सिंहले सभापतिमा उम्मेदवारी दिने घोषणा गरेका थिए ।
नेपाली कांग्रेसका प्रवक्ता विश्वप्रकाश शर्माले महामन्त्रीमा उम्मेदवारी दर्ता गरेका छन् । उनी एक्लै महामन्त्रीमा उम्मेदवारी दर्ता गर्न गएका थिए ।
महामन्त्रीमा उम्मेदवारी दर्ता गरेर फर्केपछि शर्माले आफूले प्रकाशमान सिंह प्यानलबाट महामन्त्रीमा उम्मेदवारी दर्ता गराएको घोषणा गरेका छन् ।
उम्मेद्वार दर्ता गराउन सभागृह पुग्दा शर्माको समर्थनमा कार्यकर्ताले नाराबाजी लगाएका थिए ।
पार्टी प्रवक्ता विश्वप्रकाश शर्मा देउवा र कोइरालाको साथ छाडेर प्रकाशमान सिंहको प्यानलमा पुगेका हुन् । उनलाई देउवा र शेखर कोइराला समूहले महामन्त्रीको सूचीमा राखेनन् । जबकि शर्माले धेरै अघि महामन्त्रीमा उम्मेदवारी दिने घोषणा गरिसकेका हुन् ।
शर्मा कांग्रेसमा निकै लोकप्रिय छन् । तर, आकांक्षी धेरै हुँदा शर्मा देउवा र शेखरको टिममा पर्न सकेनन् ।
गृह जिल्ला झापाको राजनीतिक प्रतिस्पर्धामा सिटौलाले शर्मालाई रोक्न खोजेको आरोप शर्मा पक्षको रहेको छ । शर्मा पक्षका नेताले देउवालाई मनाउने प्रयास पनि भइरहेको बताइएको छ ।
