लनेपाली काङ्ग्रेसको प्रदेश नम्बर १ को मतगणना पुनः गर्नुपर्ने मागको सम्बन्धमा निर्वाचन समितिले केन्द्रको निर्देशन कुर्ने भएको छ । प्रदेश १ सभापतिका उम्मेदवार गुरुराज घिमिरेले मतपरिणाम चित्त नबुझेपछि पुनः मतगणना गर्न माग गर्दै निवेदन दिएका थिए ।
पुनः मतगणना गर्दै निवेदन परेको सम्बन्धमा के गर्ने भनी केन्द्रसँग राय लिन पत्राचार गरिएको काङ्ग्रेसको प्रदेश निर्वाचन समितिका प्रमुख भरत थापाले जानकारी दिए । पुनः मतगणनाका लागि निवेदन आएको र यस विषयमा केन्द्रीय निर्वाचन समितिसँग राय लिएर मात्र के गर्ने नगर्ने भन्ने निर्णयमा पुग्ने उनको भनाइ छ ।
उनले केटिएम दैनिकसँग भने, ‘मत गणनाका लागि निवेदन आएको छ । अब केन्द्रीय निर्वाचन समितिलाई पत्राचार गर्छौँ । उताबाट जे निर्णय हुन्छ सोहीअनुरूप गर्छौँ ।’ सोमबार बिहान मतपरिणाम सार्वजनिक गर्दै समितिले काङ्ग्रेसका सभापति शेरबहादुर देउवा र नेता कृष्णप्रसाद सिटौला समूहका उद्धव थापा विजयी भएको घोषणा गरिसकेको थियो ।
विजेता घोषणा गरिसकेका कारण आफैँले पुनः मतगणना गर्न नमिल्ने भएका कारण केन्द्रको निर्णय पर्खिनुु परेको उनको भनाइ छ । काङ्ग्रेस १४औँ महाधिवेशनअन्तर्गत प्रदेश १ सभापतिमा घिमिरे दुई मतले हारेपछि पुनः मतगणनाको माग गरेका थिए ।
आइतबार राति अबेरसम्म अग्रता बनाएपनि सोमबार बिहान आएको अन्तिम मतपरिणाममा दुई मतले पराजित हुनुु परेपछि घिमिरेले पुनः मतगणनाको माग राखेका हुन् । नेपाल विद्यार्थी सङ्घका पूर्वअध्यक्ष गुरुराज घिमिरले आठ सय ४२ मत प्राप्त गरेका थिए । थापाले भने आठ सय ४४ मत पाएका थिए ।
