नेपाली काङ्ग्रेस १४औँ महाधिवेशनअन्तर्गत प्रदेश १ सभापतिमा हारेपछि गुरुराज घिमिरेले पुनः मतगणनाको माग गरेका छन् । आइतबार राति अबेरसम्म अग्रता बनाएपनि सोमबार बिहान आएको अन्तिम मतपरिणाममा दुई मतले पराजित हुनुु परेपछि घिमिरेले पुनः मतगणनाको माग राखेका हुन् ।
नेपाल विद्यार्थी सङ्घका पूर्वअध्यक्ष गुरुराज घिमिरे काङ्ग्रेसका सभापति शेरबहादुर देउवा र नेता कृष्णप्रसाद सिटौला समूहका उद्धव थापासँग झिनो अन्तरले पराजित भएका हुन् । यसअघिका काङ्ग्रेस झापा जिल्ला सभापतिसमेत रहेका उनले आठ सय ४४ मत प्राप्त गरेका थिए ।
वरिष्ठ नेता रामचन्द्र पौडेल र कोइराला समूहको समर्थनमा सभापतिको उम्मेदवार बनेका घिमिरेले आठ सय ४२ मत प्राप्त गरेका थिए । प्रदेश १ मा कुल १ हजार सात सय ५२ मत खसेको थियो । मतगणनाको सुरुआततिर घिमिरेले लगातार अग्रता पारेका भएपनि अन्तिम मतरिणाममा थापाले बाजी जितेका हुन् ।
आफू पराजित भएपछि घिमिरेले भने मतपरिणाममा चित्त नबुझेको भन्दै पुनः मतगणनाका लागि केन्द्रीय निर्वाचन र प्रदेश निर्वाचन समितिमा निवेदन दिएका छन् ।
यस्तै, दुई उपसभापतिमा टङ्कप्रसाद राई आठ सय ४७ मत ल्याउँदै विजयी भए भने रमेशजंग रायमाझीले आठ सय ९१ मत ल्याएर विजयको झन्डा गाडे । दुई महामन्त्रीमा आठ सय २४ मत ल्याएका भूपेन्द्र राई र आठ सय २३ मत ल्याउन सफल उमेश थापा विजयी भए ।
सहमहामन्त्री महिलामा प्रमिला गच्छदारले आठ सय ३७ मत प्राप्त गर्दै जित हासिल गर्दा दुई सहमहामन्त्रीमा खड्ग फागो र विनोदकुमार बस्नेत निर्वाचित भए । फागोले एक हजार २६ तथा बस्नेतले सात सय ४७ मत ल्याए ।