नेपाली कांग्रेसको १४औँ महाधिवेशनअन्तर्गत प्रदेश १ सभापतिमा संस्थापनइतर पक्षका गुरुराज घिमिरेले अग्रता कायमै राखेका छन् । आइतबार साँझसम्ममा ६०० सय मत गन्दा घिमिरेले २९९ मत प्राप्त गरेका छन् ।
यता, संस्थापन पक्षका उम्मेवार उद्धव थापा २७६ मतसहित घिमिरेलाई पछ्याउँदै छन् । उप सभापतिमा रमेशजङ्ग रायमाझीले २९२ मत पाउँदा टङ्कप्रसाद राईले २८३ मत, गोविन्द ढुङ्गानाले २५७ र विश्वनाथ रिजालले २३३ मत पाएका छन् ।
महामन्त्रीका उम्मेदवार उमेश थापाले २७९ मत र दिपेनकुमार श्रेष्ठले २६५, भुपेन्द्र राईले २६० र पदमसुन्दर पालुङवाले २६९ मत पाएका छन् ।
सहमहामन्त्री महिलातर्फ सीता कार्कीले २७२ र प्रमिलाकुमारी गच्छदारले २७८ मत पाएका छन् ।
सहमहामन्त्री पुरुषतर्फ खड्ग फागो ३४५ मत, वीरकाजी राई २२८, विनोदकुमार बस्नेत २६४, रोहितकुमार साह २२७ र शुभचन्द्र राईले २१ मत पाएका छन् ।
शनिबार ढिलो नै मतदान सम्पन्न भएको थियो । बिहान ८ बजेदेखि भनिएको मतदान अपराह्न २:१५ देखि सुरु भई राति ८ बजेसम्म विराट नर्सिङ होम अस्पताल पूर्वतर्फको खाली चौरमा बनाइएको मतदान केन्द्रमा मतदाताले मतदान गरेका थिए ।
कूल एक हजार ७७० मतदातामा एक हजार ७५२ मत खसेको थियो । ५२ जना प्रतिनिधि मतदान प्रक्रियामा सहभागी भएनन् ।
