झापाको कनकाई नगरपालिका–३ पवित्रा पेट्रोल पम्पस्थित पूर्वपश्चिम राजमार्गमा बोलेरोको ठक्करबाट मोटरसाइकल चालकको मृत्यु भएको छ । मृत्यु हुनेमा झापा कनकाई नगरपालिका–६ का ६० वर्षीय कविराज बोहोरा रहेका छन् ।
सो दुर्घटनामा परेर प्रहरीसहित बोलेरोमा सवार चार जना घाइते भएका छन् । मङ्गलबार दिउँसो २ बजेतिर पश्चिमतर्फ जाँदै गरेको मे ९ प ६५१९ नम्बरको मोटरसाइकललाई मे १ ज १४०५ नम्बरको बोलेरोले पछाडिबाट ठक्कर दिएको थियो ।
बोलेरोको ठक्करबाट घाइते भएका बोहोराको बिएन्डसी अस्पतालमा उपचारको क्रममा बेलुका साढे ७ बजे मृत्यु भएको हो । प्रदेश १ ट्राफिक प्रहरी प्रवक्ता डिएसपी सुमन तिम्सिनाका अनुसार दुर्घटनामा बोलेरोमा सवार सङ्खुवासभाको धर्मदेवी नगरपालिका–६ का ३८ वर्षीय गणेशबहादुर राई, इलामको सन्दकपुर गाउँपालिका–१ की २८ वर्षीया सङ्गीता राई, २६ वर्षीया ममता राई र झापाको गौरादह नगरपालिका–१ की ४१ वर्षीया बिमला लिम्बू घाइते भएका छन् । घाइतेमध्ये गणेशबहादुर नेपाल प्रहरीका हवल्दार हुन् । उनी उदयपुरको लालपत्ता प्रहरी चौकीमा कार्यरत छन् ।
घाइतेहरूको बिर्तामोडको विभिन्न अस्पतालमा उपचार भइरहेको छ । यस्तै, बोलेरो र चालक इलाम देउमाई नगरपालिका–१ का २७ वर्षीय निमेश गुरुङ इलाका प्रहरी कार्यालय सुरुङ्गाको नियन्त्रणमा रहेका छन् । प्रहरीका अनुसार तीव्र गतिमा रहेको बोलेरोका कारण दुर्घटना भएको प्रारम्भिक अनुसन्धानबाट खुलेको छ ।