गोरखा । नेपाली कांग्रेसका युवा नेता राजेन्द्र बजगाईको गोरखामा अलग पहिचान छ । लामो समय पर्यटन व्यवसाय गरेका बजगाई कांग्रेसको महासमिति सदस्य र प्रदेशसभा सदस्यका उम्मेदवारमात्रै होइनन्, संकटका सारथी समेत हुन् ।
गोरखाको उच्च हिमाली क्षेत्रमा मानवीय संकट पर्नासाथ अधिकांशले बजगाईलाई सम्झन्छन् । मंगलबार कांग्रेस महाधिवेशन प्रतिनिधि फणिन्द्र भट्टलाई अचानक हृदयघात भयो । गोरखामै उपचार गर्नुभन्दा काठमाडौं पुर्याउनु नै उपयुक्त हुने सल्लाह गरेर फणिन्द्रका आफन्तले राजेन्द्रलाई फोन गरे ।
बजगाईले तत्काल हेलिकप्टरको प्रबन्ध गरेर गोरखा पठाए । हेलिकप्टरबाट उद्धार गरिएका भट्टको ललितपुरस्थित मेडिसिटी अस्पतालमा उपचार भइरहेको छ । केही समयमात्रै विलम्व भएको भए भट्टको जीवन नै जोखिममा पर्ने चिकित्सकको भनाई छ ।
शनिबार मात्रै बजगाईले गोरखाको एक गाउँमा करेन्ट लागेर गम्भीर घाइते भएका ४० वर्षीय लाटा गुरुङलाई हेलिकप्टरमार्फत उद्धार गरेका थिए । तत्काल आवश्यक पर्नासाथ पैसा तिर्न तयार हुँदापनि हेलिकप्टर सुविधा लिन असहज हुने गर्छ ।
पर्यटन व्यवसायी समेत भएकाले बजगाईको हेलिकप्टर व्यवसायीसँग राम्रो सम्बन्ध छ । बजगाईको अनुरोधमा तत्काल हेलिकप्टर उड्ने हुँदा अप्ठ्यारोमा पर्ने जोकोहीले उनैलाई सम्झन्छन् । हेलिकप्टर उड्नुअघि हेलिकप्टर खर्चको जमानी बजगाई आफै बस्छन् ।
कतिपय बिरामी वा आफन्तले आफै हेलिकप्टरको खर्च तिर्छन् । कसैले तिर्न सक्ने अवस्था रहेन भने बजगाईले नै प्रबन्ध गर्ने गरेका छन् । पैसा भन्दापनि संकटमा परेकालाई बजगाईले गरेको सहयोग ठूलो हो । गोरखाका हकमा एकप्रकारले बजगाई संकट समाधान गर्ने हटलाइन जस्तै बनेका छन् ।
‘कुनै अप्ठ्यारो पर्दा १०० मा कल गरेजस्तै भएको छु । अप्ठ्यारोमा पर्दा गोरखाका दाजु भाई दिदीबहिनीले सम्झनुहुन्छ । मैले संयोजन गरेर संकटमा परेकाको उद्धार गर्छु । उनीहरुको ज्यान बचाउन सकेको क्षण म सबैभन्दा खुसी हुन्छु’, बजगाईले भने ।
उनले धेरैपटक गोरखामा हेलिकप्टर पठाएर बिरामी र दुर्घटनामा परेकाहरुको उद्धार गरेका छन् । तर कतिपयले यसमा पनि विरोध नै गरेका हुन् । स्वच्छ भावनाले गरेको काममा पनि कतिपयले कालो धब्बा लगाउन खोजेपनि आफू निराश नभएको बजगाई बताउँछन् ।
‘केही नियोजित एवं प्रायोजित मान्छेहरु मैले सेवा गर्दापनि मलाई हिलो छ्याप्न उद्यत छन् । त्यसबाट मलाई कुनै फरक पर्दैन बरु समस्यामा परेका जोकोहीलाई सघाउन अझ प्रेरित हुने गरेको छु’, उनले भने ।
राजनीतिक व्यक्तित्व भएका कारण असल काम गर्दापनि बजगाईविरुद्ध प्रतिस्पर्धीहरुले ‘दुष्प्रचार’ गर्ने गरेका छन् । यद्यपि सेवाका लागि सम्झौता नगर्ने भन्दै बजगाई आफ्नो बुताले भ्याएसम्म सबैलाई सहयोग गर्ने बताउँछन् । ‘पैसा तिर्छु भन्दापनि हेलिकप्टर बेलैमा नउडेर मान्छेको ज्यान जानसक्छ ।
मैले मेरो सम्बन्धका आधारमा गोरखामा कसैलाई समस्या पर्दा तत्काल उद्धार गरेको हुँ । मैले सकेसम्म सधैं सबैलाई सेवा गर्न तयार छु’, उनले भने ।