काठमाडौँको कलंकीमा मंगलबार साँझ बसको ठक्करबाट पठाओ स्कुटरमा सवार दुई जनाको मृत्यु भएको छ । मृत्यु हुनेमा स्कुटर चालक धादिङको खरी गाउँपालिका २ घर भएका ३५ वर्षीय रामबहादुर आचार्य र पछाडी सवार बाँके घर भएका ५२ वर्षीय यादवकुमार शाह रहेका छन् ।
साँझ पौने ५ बजे कलंकीबाट बल्खु तर्फ जाँदै गरेको प्रदेश ३ ०२ ०१४ प ७४६३ नम्बरको स्कुटरलाई विपरीत दिशाबाट आउँदै गरेको प्रदेश ३ ०१ ००५ ख ९३०० नम्बरको बसले ठक्कर दिएको थियो ।
बसको ठक्करबाट घाइते भएका उनीहरूको उपचारको क्रममा बल्खुको बयोध्या अस्पतालमा मृत्यु भएको हो । बससहित चालकलाई महानगरीय प्रहरी वृत्त कालिमाटीले नियन्त्रणमा लिएको छ ।
पठाओ दुर्घटनामा बीमा पाइन्छ ?
पठाओ सवारीसाधन दुर्घटनामा परेको खण्डमा त्यसमा सवार चालक र यात्रुले बीमा वापत (निधनको हकमा रु ५ लाख) रकम पाउँछन् तर बीमाको रकम पाउनको लागि पठाओ राइडरले अनलाइन ट्रीप गरेको हुनुपर्छ । पछिल्लो समय राइडरहरूले अफलाइन ट्रीप अर्थात मोलमोलाइको आधारमा सवारी चलाउने गरेका छन् । कम्पनीले लिने कमिसनबाट मुक्त हुन उनीहरूले अफलाइन राइड गर्ने गरेको नाम नबताउने शर्तमा एक राइडरले केटिएम दैनिकलाई बताए ।
पठाओ नेपालले दिएको जानकारी अनुसार बीमा पाउनको लागि जुन व्यक्तिको नाममा पठाओ रजिष्टर गरिएको छ उही व्यक्ती नै सवार हुनुपर्छ र आफ्नो नागरिकता अनुसारको नामथर नै पठाओमा रजिष्टर गरेको हुनुपर्छ ।
अर्को व्यक्तिको नामबाट बुक भएको ट्रीपमा चढ्दा दुर्घटना भएको खण्डमा बीमा दावी गर्न पाइँदैन ।
