इजरायल जानको लागि वैदेशिक रोजगार विभागबाट छनोट भएका कामदाहरूले राजधानीका चार अस्पतालबाट मात्र स्वास्थ्य परीक्षण गर्न पाउने भएका छन् ।
वैदेशिक रोजगार विभागले आज एक सूचना जारी गर्दै पहिलो चरणमा ५०० जनाको स्वास्थ्य परीक्षण हुने बताएको छ । छनोट भएका ८२१ जना महिलामध्ये पहिलो चरणमा कात्तिक २९ गते देखि मंसिर ५ गतेसम्म क्रम संख्या अनुसार १ देखि ३५० सम्मका उम्मेद्वारहरूको परीक्षण गरिनेछ भने १५० जना पुरुषहरूको परीक्षण हुनेछ ।
ललितपुरको स्टार अस्पतालमा महिलाहरूको क्रमसङ्ख्या १ देखि ८७ सम्म र पुरुषहरूको १ देखि ३८ सम्मको परीक्षण हुनेछ । त्यस्तैगरी ह्याम्पस अस्पतालमा महिलाहरूको ८८ नम्बरदेखि १७५ र पुरुषहरूको ३९ देखि ७५ सम्मको परीक्षण हुनेछ वैदेशिक रोजगारी विभागका महानिर्देशक दिपक काफ्लेले बताए ।
काफ्लेका अनुसार ललितपुरको मेडासिटी अस्पतालमा १७६ देखि २६३ क्रमसंख्याका महिलाहरू र ७६ देखि ११२ क्रमसङ्ख्याका पुरुषहरूको परीक्षण हुनेछ । त्यस्तैगरी स्वयम्भुमा रहेको मनमोहन मेमोरियल मेडिकल कलेजमा २६४ देखि ३५० क्रमसङ्ख्या भएका महिला र ११३ देखि १५० क्रमसङ्ख्या भएका पुरुषहरूको स्वास्थ्य परीक्षण गरिने छ ।
साथै इजरायल जाने कामदारहरूले प्रहरी चारित्रिक प्रमाणपत्रको लागि https://opcr.nepalpolice.gov.np मार्फत अनलाइन आवेदन दिन सक्नेछन् ।
स्वास्थ्य परीक्षणको प्रमाणपत्र सम्बन्धित अस्पतालवाटै विभागलाई उपलब्ध हुनेछ तर प्रहरी चारित्रिक प्रमाणपत्रको हकमा स्पष्ट बुझिने गरी स्क्यान प्रति उम्मेदवार स्वयंले विभागको israelsec[at]dofe.gov.np इमेलमा मिति २०७८ मंसिर ५ गतेसम्म पेश गर्नु पर्नेछ ।