इटहरी उपमहानगरपालिकाका मेयर द्वारिकालाल चौधरीले नेकपा एकीकृत समाजवादीका अध्यक्ष माधवकुमार नेपाल आफ्नो घरमा खाना खान मात्रै आएको र आफू नेकपा एमालेमै रहेको प्रष्टीकरण दिएका छन् ।
गत शुक्रबार नेकपा एकीकृत समाजवादीका अध्यक्ष नेपालसहितका नेताहरूसँग बसेर खाना आएको तस्बिर सार्वजनिक भएपछि उनी नेकपा एस मा प्रवेश गर्नसक्ने भन्दै विभिन्न सञ्चारमाध्यमहरूमा समाचार सम्प्रेषण भएको थियो ।
इटहरीमा आइतबार पत्रकारहरूसँग कुरा गर्दै चौधरीले आफू अहिले पनि एमालेमै रहेको र नेकपा एसमा जान सम्भव नहुने बताए । ‘माधव नेपाल मकहाँ आउनु भयो । मैले खाना खुवाएको हुँ’, चौधरीले भने, ‘खाना खाएर माधव नेपाल फर्कनुभयो । म नेकपा एसमा गएको हल्ला गलत हो । अहिले पनि एमालेमै छु ।’
गत शुक्रबार चौधरीले आफ्नो इटहरी लबिपुरस्थित घरमा नेकपा एस का अध्यक्ष माधव कुमार नेपाल र प्रदेश १ का मुख्यमन्त्री राजेन्द्र राईसहितको टोलीलाई खसीको मासु, लोकल कुखुराको मासु र माछाका विभिन्न परिकारले सत्कार गरेका हुन् । उनले स्वागत गर्दै इटहरी उपमहानगरभित्र बाढीको समस्या, छ लेन सडकमा भएको अवरोध तथा अन्य विषयमा लिखित ध्यानाकर्षण पत्रसमेत नेपाललाई र मुख्यमन्त्री राईलाई दिएका थिए ।