५० सासंदहरूको समर्थनसहित प्रदेश १ को मुख्यमन्त्रीमा नेकपा एकीकृत समाजवादीका संसदीय दलका नेता राजेन्द्र राईले दाबी पेस गरेका छन् ।
सोमबार मुख्यमन्त्री पदबाट भीम आचार्यले राजीनामा दिएपछि प्रदेश प्रमुख सोमनाथ अधिकारी प्यासीले दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्रीमा दाबी पेस गर्न मंगलबार दिउँसो १ बजेसम्मको समय तोकेका थिए ।
प्रदेश प्रमुखबाट दाबी पेस गर्न आह्वान भएलगत्तै राईले गठबन्धनमा आवद्ध पाँच दलका प्रदेशसभा सदस्यहरुको हस्ताक्षरसहित दाबी पेस गरेका हुन् । ९२ सदस्यीय प्रदेशसभामा बहुमतका लागि कम्तीमा ४७ जना सांसदको समर्थन आवश्यक हुन्छ ।
प्रदेशसभामा नेकपा एमालेको ४१ सांसदमात्र छन् । उता विपक्षी गठबन्धनमा नेपाली काँग्रेसको २१, माओवादी केन्द्रको १५, नेकपा एकीकृत समाजवादीको १०, जसपाका तीन सांसद छन् भने लोकतान्त्रिक समाजवादी पार्टीका एक सांसद छन् ।
नयाँ मुख्यमन्त्रीको शपथ ग्रहण मङ्गलबार दिउँसो हुने
५० सासंदहरूको समर्थनसहित मुख्यमन्त्रीमा दावी गरेका राईले मङ्गलबार नै सानो आकारको मन्त्रीमण्डल विस्तार गर्ने भएका छन् । मङ्गलबार सानो आकारको मन्त्रीमण्डल बिस्तार गर्ने र तिहारपछि पूर्ण रुपमा मन्त्रीमण्डल विस्तार गर्ने तयारी भएको नेकपा एसका नेता राजेन्द्र राईले केटिएम दैनिकलाई बताए ।