व्यवसायिक साझेदारकै योजनामा इँटाभट्टा व्यवसायीमाथि खुकुरी प्रहार भएको खुलासा भएको छ । उच्च अदालत विराटनगरको गेटमै काभ्रे घर भएका ३२ वर्षीय कलामसिंह लामामाथि खुकरी प्रहार भएको थियो । सञ्चालकबीच विवाद हुँदा इँटा उद्योगको कारोबार जिल्ल्ला प्रशासन कार्यालय मोरङले रोकिदिएपछि इँटा व्यवसायी लामा अदालतमा मुद्दा दर्ताको तयारीमा थिए । मुद्दा दर्ताका लागि अघिल्लो दिन बिहान काठमाडौंँबाट आएलगत्तै वरिष्ठ अधिवक्ता सुरेशलाल श्रेष्ठको ल फर्ममा पुगेका उनीमाथि खुकुरी प्रहार भयो ।
खुकुरी प्रहारबाट पेट, हातलगायत शरीरका विभिन्न भागमा गहिरो चोट लागेपछि विराटनगरस्थित विराट नर्सिङ होम एवम् विराटनगर अस्पतालमा उपचार गराइ थप उपचारका लागि उनलाई काठमाडौँ पु¥याइएको थियो । खुकुरी प्रहार गरेको आरोपमा प्रहरीले विराटनगर–११ का २७ वर्षीय बिमल कार्की पक्राउ गरेको छ । उच्च अदालतकै अगाडि खुकुरी प्रहार गर्नेमध्ये अरू दुई व्यक्ति फरार छन् ।
यता, उनका व्यवसायिक साझेदार मोहम्मद साजिक मियाँकै योजनामा उनीमाथि खुकुरी प्रहार भएको प्रहरीले जनाएको छ । मियाँ र खुकुरी प्रहारमा संलग्न विमल कार्कीलाई प्रहरीले पक्राउ गरेको छ भने घटनामा संलग्न अन्य दुई जना अझै फरार छन् ।
भक्तपुरका रमेश राजवहाक र मोरङका नेत्र कट्टेल फरार छन् । प्रहरीले उनीहरुलाई फरार प्रतिवादी बनाएर मुद्दा दायर गर्न लागेको छ । चारजनाविरुद्ध ज्यान मार्ने उद्योगमा मुद्दा चलाउन लागिएको छ । व्यवसायीक साझेदारीकै विषयमा विवाद हुँदा खुकुरी प्रहार भएको देखिएको मोरङका एसपी जनार्दन जिसीले बताए ।
‘घटनामा संलग्न साझेदारसहित दुई जना पक्राउ परिसकेका छन्,’ एसपी जिसीले भने, ‘दुई जना फरार छन्, उनीहरुको खोजी भइरहेको छ ।’ ५० हजार रुपैयाँ दिएर लामामाथि खुकुरी हान्न लगाएको प्रहरी अनुसन्धानमा खुलेको हो । योजनाकारमध्ये राजवहाक समेत भएको प्रहरीले जनाएको छ । उनी काठमाडौंमा खुलेआम हिँडेंपनि प्रहरीले पक्राउ गर्न चासो दिएको छैन ।
काभ्रे घर भई भक्तपुरको सूर्यविनायक नगरपालिका–८ मा बस्दै आएका लामा दुई वर्षअघि व्यवसाय सञ्चालनका लागि विराटनगर आएका थिए । मोरङको कटहरी गाउँपालिका–६ मा उनको जग्गामा मोरङ राजधानी इँटा उद्योग सञ्चालनमा छ । सो उद्योग मोरङको नोचाका मोहम्मद साजितको नाममा थियो । साझेदारीमा सञ्चालनका लागि उद्योगको आधा हिस्सा लामालाई दिए ।
लामाका सहयोगीका अनुसार उद्योग सञ्चालनका लागि साजितले लगानी गरेनन् । पैसा नभएको बताएपछि लाइसेन्स प्रयोग गरेवापत वार्षिक ५० हजार इँटा दिने सहमति भएको थियो । तर पछिल्लो समय साजितले समान हिस्सा खोजे । पाँच वर्षका लागि सम्झौता भए पनि अगाडि नै सम्झौता तोडिएपछि उनीहरूको विवाद बढ्यो । विवाद बढ्दै गएपछि स्थानीय पालिका हुँदै जिल्ला प्रशासन कार्यालय मोरङले कारोबार तत्कालका लागि रोक्न भन्यो । कारोबार रोकिएपछि भने उनी कानुनी प्रक्रियामा जाने निर्णयमा पुगे । कारोबार फुकुवाको मागसहित मुद्दा दर्ताको तयारी गरेर निस्कँदा उनीमाथि खुकुरी प्रहार भयो ।
काठमाडौंँमा व्यवसाय गर्दै आएका लामालाई रमेशराज नाम गरेका व्यक्तिले मोरङ ल्याएका थिए । इँटा उद्योग विवादमा उनी पनि साजितको पक्षमा उभिएका छन् । विवाद बढेपछि लामालाई लखेटेर उद्योग हत्याउने उनीहरूको प्रयास रहेको उनी निकट स्रोत बताउँछ । उद्योग हत्याउनका लागि विराटनगरका गुन्डागर्दीमा संलग्नहरू पनि प्रयोग भएका थिए । आइतबार खुकुरी प्रहार गर्ने गुन्डागर्दीमा संलग्न समूहका सदस्यहरू हुन् ।