नेपाली काँग्रेसका उपसभापति विमलेन्द्र निधिले पार्टीले मधेसलाई रिझाउन नसके अगामी निर्वाचनमा पार्टीलाई ठुलो नोक्सान हुने दाबी गरेका छन् ।
विगत केही दिनदेखि गृह जिल्ला धनुषामा रहेका उपसभापति निधिले सोमवार पत्रकारहरूसँग कुराकानीमा पार्टीको जनधार मधेस नै रहेकोले मधेसलाई विश्वासमा लिनुको विकल्प नरहेको बताए ।
काँग्रेसको आधार भूमि पूर्वमा मेचीदेखि पश्चिममा महाकालीसम्म मधेस रहेको भन्दै नेता निधिले भने,‘ काँग्रेस जहिले पनि मधेसकै भोटको सहयोगमा निर्वाचनमा राम्रो परिणाम ल्याउन सकेको छ । मधेसको सहयोगबिना काँग्रेस कहिल्यै पनि निर्वाचनमा राम्रो गर्न सकेनन् ।
त्यस कारण काँग्रेसलाई मधेसको सहयोग आवश्यक छ । पार्टीका शीर्ष नेताहरूले पनि यो कुरा बुझिरहेका छन् । तर, अब मधेसले के चाहेको छ ? मधेसलाई कसरी रिझाउन सकिन्छ भन्ने कुरा पार्टीका शीर्ष नेताहरूको हातमा छ ।’
मधेसका जिल्लाहरूको भ्रमणमा जाँदा नेता तथा कार्यकर्ताहरूले आफूले सभापतिमा उम्मेदवारी दिएकोमा खुसी भएको र शुभकामना पनि दिएको नेता निधिले बताए ।
पार्टीलाई मधेस र देशमा मजबुत बनाउन आफूले पार्टीको आसन्न महाधिवेशनमा सभापतिमा उम्मेदवारी दिने घोषणा गरेको दाबी गर्दै नेता निधिले भने, ‘पार्टीका अधिकांश शीर्ष नेताहरूले पार्टीलाई मधेसको सहयोगको अति आवश्यक छ, तपाईँ अगाडि आउनुस्, हामी सहयोग गर्छौँ भनेर आश्वासन पाएको छु । र मलाई लाग्छ उहाँहरूले मलाई सभापतिमा सहयोग गर्नुहुन्छ ।’
पार्टीका शीर्ष नेताहरू रामचन्द्र पौडेल, शशांक कोइराला, कृष्णप्रसाद सिटौला, प्रकाशमान सिंह लगायतसँग सभापतिको विषयमा निरन्तर छलफल भइरहेको नेता निधिले बताए ।
पार्टीको महाधिवेशनमा सत्ताको दुरूप्रयोग नहुनेमा आफू विश्वस्त रहेको नेता निधिले बताए ।