बङ्गलादेशमा अल्पसङ्ख्यक हिन्दु र मुस्लिम समुदायबिच भएको हिंसामा एक सातामा हिन्दु धर्मावलम्बीका कम्तीमा ३० घरमा आगो लगाइएको छ ।
मुसलमान समुदायमा आबद्ध व्यक्तिले हिन्दुका ६६ ओटा घर भत्काइदिएका छन् । गत साता दुर्गा पूजाका क्रममा हिन्दुले मुसलमानमाथि कथित निन्दा गरेको र सामाजिक सञ्जालमा अपमानजनक पोस्ट गरेको भन्दै त्यहाँका मुसलमान अल्पसङ्ख्यक हिन्दुमाथि जाइलागेका थिए ।
पछिल्लो पटक राजधानी ढाकाबाट २२५ किलोमिटर टाढाको एउटा गाउँमा मुसलमानहरूले हिन्दुको घरमा आगजनी गरेका थिए ।
एक हिन्दुले फेसबुकमा मुसलमानप्रति अनादर जनाउने टिप्पणी गरेको कथित हल्लापछि मुसलमान समुदाय हिन्दुका घरमा आगजनीमा उत्रिएको प्रहरीले जनाएको छ ।
प्रहरीले ती व्यक्तिको घरमा सुरक्षा गरिरहेका बेला आक्रमणकारीले उनको घरनजिकका अन्य घरमा आक्रमण गरेको थियो । बङ्गलादेशको अग्नि नियन्त्रक कक्षका अनुसार माजहिपरा जिल्लामा एक सातामा मुस्लिम आक्रमणकारीले १५ जना हिन्दुका २९ आवासीय घर, दुई वटा किचेन, तथा २० ओटा झुपडीमा आगजनी गरेका छन् ।
दुर्गा पूजाका क्रममा चित्तागोङको कुमिलामा मुस्लिम धर्मगुरुमाथि निन्दा गरिएको कथित आरोपपछि धार्मिक तनाव बढेको थियो ।
आक्रमणकारीले कुमिला, चन्दपुर, चाटोग्राम, कोक्स बजार, बन्दरबान, मउलिभीबजार, गाजीपुर, फिनीलगायतका जिल्लाका हिन्दु मन्दिरमा हमला गरेको बङ्गलादेश प्रहरीले जनाएको छ ।