गैरआवासीय नेपाली सङ्घ (एनआरएनए) को कार्यकाल ६ महिना थप गरिएको छ । गैरआवासीय नेपाली सङ्घको शनिवार सम्पन्न बैठकले विधानको धारा १३ को उपधारा २ बमोजिम वर्तमान कार्यसमितिको कार्यकाल ६ महिना थप्ने निर्णय गरेको सङ्घका सचिव गौरीराज जोशीले बताए ।
कुमार पन्तको अध्यक्षतामा बसेको भर्चुअल बैठकले सङ्घको १० औँ महाधिवेशन तथा निर्वाचन आगामी ३० नोभेम्बर भित्र गर्ने निर्णय गरेको छ ।
यसअघि सङ्घको महाधिवेशन प्रतिनिधि छनोटको विषयमा विवाद हुँदा परराष्ट्र मन्त्रालयमा उजुरी परेपछि मन्त्रालयले सङ्घको निर्वाचन सम्बन्धी सम्पूर्ण प्रक्रिया रोक्न पत्राचार गरेको थियो ।
मन्त्रालयको पत्रपछि २३ देखी २५ अक्टोबरका लागि तय गरिएको १० औँ महाधिवेशन तथा विश्व सम्मेलन स्थगित भएको थियो ।
बैठकले महाधिवेशन प्रतिनिधिहरूका विषयमा आएका गुनासा सम्बोधन गर्न सङ्घका पूर्वअध्यक्षहरुसँगको परामर्शमा एक स्वतन्त्र समिति गठन गर्ने निर्णय गरेको छ ।
बैठकमा केन्द्रीय पदाधिकारी, सल्लाहकारसहित करिब १०० भन्दा बढी सदस्यहरूले आआफ्ना भनाई राखेका थिए ।
अध्यक्ष पदको लागि वर्तमान कार्यसमितिका उपाध्यक्षद्धय डा. बद्री केसी, रविना थापा र पूर्व उपाध्यक्ष कुल आचार्यले उम्मेदवारी घोषणा गरेका छन् ।
सङ्घका महासचिव डा. हेमराज शर्माका अनुसार सङ्घको महाधिवेशनमा पेस हुने वार्षिक तथा आर्थिक प्रतिवेदन समेत सङ्घको विधान अनुसार १ महिना अगावै सार्वजनिक भइसकेका छन् ।
सङ्घको १० औँ महाधिवेशन तथा विश्व सम्मेलनको लागि ६४ देशका ३ हजार ५ सय प्रतिनिधिहरू चयन भइसकेका छन् । सङ्घको विधानअनुरूप यसअघि नै राष्ट्रिय समितिको महाधिवेशनबाट अन्तर्राष्ट्रिय समन्वय परिषद्को सदस्यहरू चयन भैसकेका छन् भने आगामी निर्वाचनबाट क्षेत्रीय संयोजक सहित ४८ जना पदाधिकारी निर्वाचित हुने छन् ।