प्रधानमन्त्री शेर बहादुर देउवाले आज देशका विभिन्न ठाउँमा भएका सडक दुर्घटनाले आफू स्तव्ध भएको बताएका छन् ।
दशैं मनाउन घर जाने क्रममा आज मुगुमा भएको दुर्घटनामा अहिलेसम्म ३२ जनाको ज्यान गएको छ भने हिजो कास्कीमा ८ जनाले ज्यान गुमाएका थिए ।
त्यस्तै अछाममा चार र स्याङ्जामा तीनजनाले ज्यान गुमाएका छन् । दुर्घटनामा दसैँको बिदामा घान्द्रुक घुम्न हिँडेका आन्तरिक पर्यटकदेखि विवाहका जन्तीसम्म परेका छन् । तीनवटै दुर्घटना कच्ची, जीर्ण सडकको कारण भएको छ ।
प्रम देउवाले सामाजिक सञ्जालमार्फत दुर्घटनामा ज्यान गुमाउनेप्रति श्रद्धाञ्जलि अर्पण गर्दै शोक सन्तप्त परिवारप्रति समवेदना प्रकट गरेका छन् । उनले दुर्घटनामा मृत्यु भएका मृतकका परिवारलाई उचित राहत र घाइतेको उद्दार एवं निशुल्क उपचार सरकारले गर्ने बताएका छन् ।
साथै “सडक दुर्घटना न्यूनीकरणका लागि सार्वजनिक–निजी सवारी साधनको नियमित परीक्षण एवं मर्मत गर्न, क्षमताभन्दा बढी यात्रु नराख्न र सुरक्षाका सबै मापदण्डहरू अपनाउन पनि म सम्बन्धित सबैको ध्यानाकर्षण गराउँछु” प्रधानमन्त्री शेर बहादुर देउवाको ट्विटरमा लेखिएको छ ।