केटी भगाएको आरोपमा पक्राउ परेका युवाको हिरासतमै मृत्यु भएपछि आफन्तको प्रदर्शन गरेका छन् । जिल्ला प्रहरी कार्यालय सुनसरीको हिरासतमा रहेका भोक्राहा नरसिंहका–५ का हकिव मियाँको मृत्यु भएपछि मृतकका आफन्त तथा स्थानीयले इनरुवामा विरोध प्रदर्शन गरेका हुन् ।
थुनुवाको हिरासतमै मृत्यु भएपछि जिल्ला प्रहरी कार्यालयअगाडि स्थानीयले बिहानैदेखि टायर बालेर प्रदर्शन गरिरहेका छन् । प्रदर्शनमा सहभागी हुन अन्य स्थानबाट समेत मानिस थपिन थालेपछि अवस्था तनावग्रस्त बन्न नदिन ठूलो मात्रामा प्रहरी परिचालन गरिएको छ ।
यता जिल्ला प्रहरी कार्यालय सुनसरीले भने उनले हिरासतमै आत्महत्या गरेको जनाएको छ । केही दिनअगाडि पक्राउ परेका मियाँले हिरासतमा पासो लगाएर आत्महत्या गरेको सुनसरीका प्रहरी नायव उपरीक्षक नरेन्द्रकुमार कार्कीले जानकारी दिए ।
इनरुवा–९ बबियाकी एक युवतीसँग प्रेममा परेर फरार भएका हकिवलाई केही दिनअगाडिमात्र प्रहरीले पक्राउ गरेको थियो । आफन्तले भने उनलाई प्रहरीले नै मारेको आफन्तहरुले आरोप लगाएका छन् ।
हिरासतभित्र बाहिरबाट प्रहरीको अनुमतिबिना कुनै सामग्री लैजानसमेत नपाउने अवस्थामा ति युवकले कसरी डोरीमा पासो लगाउन सक्यो ? आफन्तको शङ्का छ । हकिवले हिरासतभित्र पासो लगाएर आत्महत्या नगरेको आफन्तको दाबी छ । उनीहरूले घटनाको निष्पक्ष छानबिन हुनुपर्ने बताएका छन् ।
