ड्रग्स पार्टी गरेको अभियोगमा पक्राउ परेका बलिउड सुपरस्टार शाहरुख खानका छोरा आर्यन खानलाई अदालतले ७ अगष्टसम्मको लागि नारकोटिक्स कन्ट्रोल ब्युरोको हिरासतमा पठाएको छ । आर्यन आफ्ना साथीहरुसँग क्रुज शिप कार्डेलिया द इम्प्रेसमा चढेर मुम्बइबाट गोवा जाँदै थिए । उनीमाथि ड्रग्स सेवन गरेको सहित अन्य आरोप लगाइएका छन् ।
२ हप्ता पहिले पाएको गोप्य सूचनाका आधारमा २० जना एनसीबी अधिकारी टिकट लिएर जहाजमा चढेकाथिए । यी अधिकारीले जहाजमा नशालु पदार्थको प्रयोग सुरु नहुँदासम्म प्रतिक्षा गरे । जब यात्रीहरुले नशाको सेवन सुरु गरे त्यसपछि एनसीबी अधिकारीहरु सक्रिय भए र उनीहरुले आर्यनसहित ८ जनालाई रंगेहात पक्राउ गरे । त्यसपछि क्याप्टेनलाई निर्देशन दिएर जहाजलाई दक्षिण मुम्बइको बेलार्ड पियर अन्तर्राष्ट्रिय क्रुज टर्मिनलमा लिएर गए ।
एनसीबी अधिकारीहरुले शनिबार आर्यन समेत ८ जनालाई हिरासतमा लिए । त्यसपछि एफआइआर दर्ता गरियो । एनसीबी अधिकारीहरुले आठै जनालाई आइतबार अदालत पेश गरेर ५ अक्टोबरसम्म हिरासत मागियो तर एक दिनको मात्रै रिमान्ड दिइयो ।सोमबार आर्यनसहित आठै जनालाई मेडिकल जाँचपछि एनसीबीले अदालत पेश गर्यो । अदालतले आर्यनलाई ७ अक्टोबरसम्म हिरासतमा पठायो ।
आर्यनसहितका आरोपीलाई ‘एनडिपीएस एक्ट १९८५’ अन्तर्गत प्रतिबन्धित पदार्थको सेवन, खरिद र बिक्रीमा संलग्न भएको आरोप लगाइएको छ । आर्यनमाथि एनडिपीएस एक्टको धारा ८ सी, २० बी, २७ र ३५ अन्तर्गत आरोप लगाइएको छ । धारा ८ मा जानीजानी कुनै नशालु पदार्थ खरिद गर्ने र प्रयोग गर्नेलाई बरामद भएको ड्रग्सको परिमाणको आधारमा सजाय हुन्छ । धारा २० अनुसार आर्यनको केसमा बरामद भएको ड्रग्स ‘थोरै’ वर्गमा पर्छ । यो धाराअनुसार ६ महिना जेल, १० हजार जरिवाना वा दुवै सजाय हुन सक्छ ।
धारा २७ प्रतिबन्धित ड्रग्समा लागू हुन्छ । यसमा अधिकतम सजाय १ वर्षसम्म जेल हुन सक्छ । धारा ३५ अनुसार ड्रग्स राख्ने व्यक्तिको मानसिक अवस्था र उद्देश्य के थियो भन्ने तय गरिन्छ । आरोपीले आफ्नो उद्देश्य कानुनको उल्लंघन गर्नु थिएन भन्ने प्रमाणित गर्नुपर्छ । वा आरोपीले आफूसँग भएको पदार्थ प्रतिबन्धित हो भन्ने आफूलाई जानकारी नभएको प्रमाणित गर्नुपर्छ ।
अरेस्ट मेमोका अनुसार एनसीबीले क्रुजमा आर्यनको साथबाट १३ ग्राम कोकिन, ५ ग्राम मेफेड्रोन, २१ ग्राम चरेस र एक्सटेसीका २२ ट्याब्लेटसहित १ लाख २२ हजार नगद बरामद गरेको थियो । एनसीबीले आर्यनसहित मुनमुन धमेचा, नुपुर सारिका, इस्मित सिंह, मोहक जयसवाल, विक्रान्त छोकर, गोमित चोपडा र अरबाज मर्चेन्टलाई हिरासतमा लिएको छ ।
डिसी नेपालको सहयोगमा