आज (आइतबार) नेपालमा नयाँ पुष्टि भएका सङ्क्रमितभन्दा निको हुनेको सङ्ख्या झण्डै दोब्बर भन्दा बढी पाइएको छ ।
स्वास्थ्य तथा जनसंख्या मन्त्रालयका अनुसार वितेको २४ घण्टामा देशका विभिन्न जिल्लामा १० हजार ९२० जनाको नमूना परीक्षण गर्दा ६७९ जनामा सङ्क्रमण देखिएको छ । त्यही अवधिमा दोब्बर भन्दा बढी अर्थात १ हजार ४०५ जना निको भएका छन् ।
आज थप ७ जनाको निधन भएसँगै कोरोनाबाट ज्यान गुमाउनेको सङ्ख्या ११ हजार १६४ पुगेको मन्त्रालयले सार्वजनिक गरेको विवरणमा उल्लेख छ ।
अहिलेसम्म कूल सङ्क्रमितमध्ये ९६ दशमलव ४९ प्रतिशत अर्थात ७ लाख ६९ हजार २२४ जना निको भएका छन् ।
आइतबार अपरान्हसम्म देशमर १६ हजार ८०४ जना सक्रिय सङ्क्रमित रहेकोमा गम्भिर अवस्थाका ३३७ जनालाई आइसीयू र १०४ जनाको भेन्टिलेटरमा राखेर उपचार भैरहेको मन्त्रालयले जनाएको छ । देशभर १४ हजार ५३४ सङ्क्रमित होम आइसोलेसनमा रहेका छन् ।