नेपाली काँग्रेसका नेता गगनकुमार थापाले पार्टीमा मन टुटेका नागरिकको बिचमा गएर संवाद गर्नसक्ने नेतृत्व आवश्यक भएको बताएका छन् ।
काठमाडौँ नगरपालिकाको अधिवेशन उद्घाटन कार्यक्रममा बोल्दै थापाले काँग्रेसले जनतामा आशा र भरोसा दिलाउन नसकेको बताए । काँग्रेस अहिलेको यथास्थितिवादले जनताको विश्वास जित्न नसक्ने बताए । ‘आज जसरी चलेको छ, यसले काँग्रेसप्रति जनताको भरोसा दिलाउन सक्दैन,’ उनले भने ।
नेता थापाले काँग्रेसभित्र सुदृढीकरण आवश्यक भएको पनि बताए । तहगत अधिवेशनले काँग्रेस सुधार गर्न भूमिका खेल्नुपर्नेमा थापाको जोड थियो । ‘काँग्रेसभित्र ठुलो सुदृढीकरण र सुधारको खाँचो छ,’ उनले भने, ‘हामीलाई चाहे खुल्ला मञ्च, सडक तथा संसद् वा जनताको झुपडीमा गएर बोलेको कुरामा भरोसा दिलाउने काँग्रेस चाहिएको छ, नागरिकहरूको टुटेको मन जोड्ने काँग्रेस चाहिएको छ ।’
नेता थापाले आउँदो तीन तहको निर्वाचनबाट काँग्रेस पहिलो पार्टी बनाउनुपर्नेमा जोड दिए । सम्पूर्ण कम्युनिस्ट र मधेसवादी दलहरू मिले पनि काँग्रेस पहिलो पार्टी बन्ने गरी काम गर्न उनले आग्रह गरे ।
‘अर्काले पस्केको दुधभात खाने काँग्रेसको जात होइन । हामी आफैले एकल शक्तिका आधारमा काठमाडौँ महानगरमा पनि काँग्रेसको झन्डा गाड्ने हो । यो पटक एकल शक्तिका आधारमा फेरि पाँच वर्ष निम्ति देश चलाउने जिम्मा कोही सँग मिलेर होइन एक्लै सबै कम्युनिस्ट र मधेसका पार्टी एक भएर आए भने पनि जित्ने ताकत राख्ने गरी काँग्रेसले आफ्नो सङ्गठन निर्माण गर्नुपर्छ । यसका लागि अझै हामीसँग सङ्गठन बनाउन ६/७ महिना बाँकी छ,’ उनले भने । -न्यूज कारखाना