कोरोना भाइरस महामारीका कारण प्रभावमा परेका एक सयभन्दा बढी कुष्ठरोग प्रभावित परिवार ‘एसोसिएसन फर आइडिया’को परियोजनाबाट लाभान्वित भएका छन् । मङ्गलबार बूढीगङ्गा–२ टङ्कीसिनवारीस्थित स्वास्थ्य चौकीको भवनमा एक कार्यक्रम आयोजना गरी एसोसिएसन फर आइडियाले उक्त परियोजनाबाट एक सयभन्दा बढी रोगी र तिनका परिवार लाभान्वित भएको जानकारी दिएको हो ।
प्रदेश १ मा सञ्चालित कुष्ठ प्रभावित व्यक्तिहरूका लागि कोभिड–१९ सहयोग परियोजना २०२०–२१ बाट एक सयभन्दा बढी परिवारले लाभ लिएको परियोजनाका संयोजक देवेन्द्र डङ्गोलले जानकारी दिएका छन् । उनका अनुसार सन् २०२० नोभेम्बरदेखि २०२१ अक्टोबरसम्म सञ्चालित परियोजनाबाट प्रदेश १ का मोरङ, झापा र सुनसरी जिल्लाका एक सयभन्दा बढी कुष्ठरोगी र परिवारलाई आर्थिक, प्राविधिक, स्वास्थ्य र शैक्षिक सहयोग हस्तान्तरण गरिएको छ ।
परियोजना एसोसिएसन फर आइडिया नेपालको नेतृत्व, सासाकावा हेल्थ फाउन्डेशन (जापान) र द लिप्रोसी मिसन नेपालको प्राविधिक सहयोगमा सम्पन्न भएको उनले जताए । परियोजनाको मुख्य उद्देश्य कुष्ठ रोग प्रभावित व्यक्ति र परिवारको सबलीकरण गरी समुदायमा समान हैसियत निर्माण गर्नु रहेको संयोजक डङ्गोलले बताए ।
परियोजनाले कुष्ठरोगी र प्रभावित परिवारको सबलीकरण गर्न २५ हजारका दरले बिउ पुँजी सहयोग गरेको बताइएको छ । बिउ पुँजी पाउनेमा तीन जिल्लाका ४० परिवार रहेका छन् । प्राप्त गरेको बिउ पुँजीबाट सुरु गरिएको व्यापार–व्यवसाय (लगानी) लाई परियोजनाले नजिकबाट नियाल्दै प्राविधिक सहयोग गरिरहेको परियोजना संयोजक डङ्गोलले बताए ।
परियोजनामार्फत कुष्ठरोगी मात्रै नभई उनका बालबालिकासमेत लाभान्वित भएका छन् । तीन जिल्लाका एक सयभन्दा बढी प्रभावित व्यक्ति र परिवारका अध्ययनरत बालबालिकालाई परियोजनाले प्रतिव्यक्ति ६ हजार नगद र पाँच सय बराबरको शिक्षण सामग्री हस्तान्तरण गरेको छ । कोभिड लक्षित परियोजनाले समस्यामा परेका कुष्ठरोगीलाई खाद्यान्न र स्वास्थ्य सुरक्षाका सामग्रीसमेत प्रदान गरेको संयोजक डङ्गोलले बताए ।
समापन कार्यक्रममा उपस्थित भएका एसोसिएसनका कार्यकारी निर्देशक अम्बरबहादुर तिम्सिनाले मानिसले कुष्ठरोग बारे बुझ्दै गएको भएपनि प्रभावित मानिस र परिवारलाई समाज र राष्ट्रले हेर्ने दुष्टिकोणमा व्यापक परिवर्तन गरिनुपर्ने बताएका छन् ।
आइडिया इन्टरनेसनलका ग्लोबल नेटवर्क कोअर्डिनेटर समेत रहेका उनले निकट भविष्यमा नै आइडिया नेपालले औपचारिक शिक्षा हासिल नगरेका महिलाका लागि तालिमको व्यवस्था गरिने बताएका छन् । ‘यस्ता परियोजनाले कम्तिमा एक कुष्ठरोगी र सम्बन्धित परिवारको आर्थिक, सामाजिक र मानसिक स्तर उठाउन मद्दत गर्छ,’ उनले भने, ‘त्यसैले अब विशेषत महिला दिदीबहिनी लक्षित कार्यक्रम आइडिया नेपालले ल्याउँदै छ ।’
कूल बजेट ३५ लाख रहेको परियोजनाबाट प्रत्यक्ष रूपमा प्रदेश १ का तीन जिल्लाका एक सय कुष्ठरोगी र प्रभावित परिवार लाभान्वित भएको परियोजना सञ्चालक आइडिया नेपालको निष्कर्ष रहेको छ ।