मुख्यमन्त्री भीमप्रसाद आचार्यले आज विश्वासको मत लिने प्रयोजनका लागि मध्यान्ह प्रदेशसभा बैठक बस्दै छ । नेकपा एमाले विभाजनको दोस्रो दिन गत भदौ १० गते प्रदेश १ को मुख्यमन्त्री नियुक्त भएका आचार्यले प्रदेशसभाबाट विश्वासको मत लिँदै छन् ।
तर प्रमुख प्रतिपक्षी दल नेपाली काँग्रेस र सत्तारूढ दल नेकपा एमालेले प्रदेश १ को प्रदेशसभा बैठक स्थगित गर्न माग गरे । काँग्रेसले आफ्ना केही सांसदले फ्लोर क्रस गरेर मुख्यमन्त्री भीमप्रसाद आचार्यलाई विश्वासको मत दिने सूचना पाएपछि बैठक रोक्न माग गर्दै प्रदेशसभा सचिवालयमा लिखित निवेदन दिएको हो ।
काँग्रेसको लिखित निवेदनपछि एमालेले अब १५ गते अगाडि पार्टीको कार्यक्रमहरूले गर्दा त्यतिन्जेल सम्मका लागि बैठक रोक्न माग गर्दै निवेदन दर्ता गरेको हो ।
९२ प्रदेशसभा सदस्य रहेको प्रदेश १ मा दल विभाजन भएसँगै एमाले नेतृत्वको सरकार अल्पमतमा छ । संसद्मा बहुमतका लागि ४७ मत आवश्यक पर्छ । प्रदेशमा सत्तारूढ दल एमालेसँग ४१ जना मात्रै सांसद छन् । विपक्षी गठबन्धनमा ५० जना सांसद छन् । केन्द्रीय तहको सहमतिअनुसार प्रदेश १ र बागमतीमा नेकपा एकीकृत समाजवादीको नेतृत्वमा सरकार बन्नेछ ।
मुख्यमन्त्री आचार्यले विश्वासको मत पाउने अवस्था नरहेका कारण मङ्गलवारसम्म प्रदेश १ ले नयाँ मुख्यमन्त्री पाउने सम्भावना छ । विपक्षी गठबन्धनका तर्फबाट नेकपा एकीकृत समाजवादीका नेता राजेन्द्र राईलाई मुख्यमन्त्रीका रूपमा अघि सार्ने तयारी रहेको छ ।
तर, काँग्रेसका केही सांसदले फ्लोर क्रस गर्ने सूचना पाएपछि काँग्रेसले आजको बैठक रोक्न माग गरेको स्रोतले जनाएको छ । तथापि, काँग्रेसको निवेदनमा भने पार्टी सभापति तथा प्रधानमन्त्री शेरबहादुर देउवा प्रदेश १ को भ्रमणमा आउन लागेकाले आजको बैठक सार्न माग गरिएको छ ।
नेपाली काँग्रेसका प्रमुख सचेतक केदार कार्कीले प्रधानमन्त्री शेरबहादुर देउवा प्रदेश १ को भ्रमणमा आउन लागेकाले आजको बैठक सार्न माग गरिएको बताए ।
तथापि, सभामुख प्रदीपकुमार भण्डारीले काङ्ग्रेस र एमालेको मागका बाबजुद पनि बैठक रोक्न अस्वीकार गरेका छन् । प्रदेशसभा सचिव गोपालप्रसाद पराजुलीले संसद्को दैनिक कार्यसूचीसमेत सार्वजनिक गरेका छन् । ‘नेपालको संविधानको धारा १८८ को उपधारा (२) तथा प्रदेश १ को प्रदेशसभा नियमावली, २०७४ को नियम १२८ को उपनियम (४) बमोजिम प्रदेश नं. १ का माननीय मुख्यमन्त्री भीमप्रसाद आचार्यले सभामा पेस गर्नुभएको प्रस्तावमाथि छलफल तथा मत विभाजन हुने छ’, कार्यसूचीमा उल्लेख छ ।
यता, काङ्ग्रेसले भने प्रदेश १ सरकारमा आलोपालो नेतृत्व गर्न पाउनुपर्ने माग गरेको छ । फ्लोर क्रस गर्ने सूचना पछि काङ्ग्रेसले बैठक रोक्न निवेदन दिएको छ । संसद्मा निवेदन पछि काङ्ग्रेस संसदीय दलको बैठक बस्दै छ ।
बैठकअघि संसदीय दलका नेता राजीव कोइरालाले बाग्मती र प्रदेश १ मा छुट्टाछुट्टै नियम लागू नहुने बताए । बागमतीमा काङ्ग्रेस समाजवादी आधा आधा सत्ताको नेतृत्व गर्ने सहमति छ । उनले आलोपालो बागमतीमा छुट्टै र प्रदेश १ मा छुट्टै नियम लागू नहुने बताए ।
