देशभर आइतबार र सोमबार ६ महिनादेखि पाँच वर्षसम्मका बालबालिकालाई भिटामिन ‘ए’ क्याप्सुल र जुकाको औषधि खुवाइँदै छ ।
स्वास्थ्य तथा जनसंख्या मन्त्रालयका अनुसार आइतबार र सोमबार देशभरका ६ देखि ५९ महिनासम्मका बालबालिकालाई भिटामिन ‘ए’ क्याप्सुल र १२ देखि ५९ महिनासम्मका बालबालिकालाई जुकाको औषधिसमेत खुवाइनेछ ।
हरेक वर्ष कात्तिक २ र ४ गते खुवाउँदै आइरहेको भिटामिन ए र जुकाको औषधि यसपटक दशैं अवधिमा परेकाले ७ र ८ गते खुवाउने निर्णय गरेको गरिएको हो ।
स्वास्थ्य मन्त्रालयले मंगलबार एक सूचना जारी गरी बालबालिकाहरूलाई भिटामिन ए र जुकाको औषधि खुवाउन जाँदा जनस्वास्थ्यका मापदण्ड अपनाउन अनुरोध गरेको छ ।
स्वास्थ्य मन्त्रालयले भिटामिन ए र जुकाको औषधि खुवाउन जाँदा सही तरिकाले माक्स लगाएर जाने, कम्तीमा दुई मिटरको भौतिक दूरी कायम राख्ने, साबुन पानीले हात धुने वा स्यानिटाइजरको प्रयोग गर्ने जस्ता जनस्वास्थ्यका सम्पूर्ण मापदण्ड पालना गरी कोभिड १९ को सङ्क्रमणबाट बच्न आग्रह गरेको छ ।
तस्विरहरू