पाएको पेनाल्टीमा चुक्दा इङ्ग्लिस प्रिमियर लिगको सर्वाधिक सफल टिम म्यानचेस्टर युनाइटेड एस्टोन भिल्लासँग पराजित भयो । सबैभन्दा धेरै २० पटकको उपाधि विजेता युनाइटेड शनिबार साँझ घरेलु मैदान ओल्ड ट्राफोर्डमा १–० गोलले पराजित भयो ।
१–० गोलले पछाडि परेको अवस्थामा खेलको इन्ज्युरी समयमा युनाइटेडले पेनाल्टीको मौका पाएको थियो । ओले गुनर सोल्स्जायरको रोजाइमा दुई पेनाल्टी प्रहारकर्ता थिए । पोर्चुगिज खेलाडीद्वय क्रिस्टियानो रोनाल्डो र ब्रुनो फर्नान्डेज । तर रोनाल्डोकै अगाडि फर्नान्डेजले बल टिपे र पेनाल्टी प्रहार गरे ।
यसको कारण थियो, पेनाल्टीको तथ्यांकमा फर्नान्डेज रोनाल्डोभन्दा उत्कृष्ट हुनु । रोनाल्डोभन्दा फर्नान्डेजको पेनाल्टीमा गोल गर्ने प्रतिशत राम्रो छ । फर्नान्डेजले युनाइटेडका लागि २३ पेनाल्टी प्रहार गरेका छन्, जसमा उनले दुई वटामा मात्र गोल गर्न सकेका छैनन् । उस्टोन भिल्ला र न्युकासलसँगको खेलमा पाएका दुई पेनाल्टी मिस भएका छन् तर बाँकी २१ वटा पेनाल्टी गोलमा परिणत भएका छन् ।
हुन त रोनाल्डो पनि पेनाल्टीमा राम्रो अनुभव भएका खेलाडी हुन् । उनी रियल मड्रिड र युभेन्टस छँदा पहिलो रोजाइका पेनाल्टी प्रयोगकर्ता थिए । अनि तर फर्नान्डेजको निर्णयबाट विपक्षी गोलरक्षक इमिलानो मार्टिनेज सन्तुष्ट रहेनन्, जसरी दर्शकदीर्घामा बसेका समर्थक खुसी थिएनन् । सबै चाहन्थे रोनाल्डोले पेनाल्टी प्रहार गरुन् । मार्टिनेजले त अझ रोनाल्डोलाई पेनाल्टी प्रहार गर्न उक्साइरहेका थिए ।
अगाडि बढेर पेनाल्टी हानेका फर्नान्डेजको प्रहार पोस्टमाथिबाट बाहिरिएको थियो । फर्नान्डेजको पेनाल्टी ‘मिस’पछि युनाइटेडका लागि कसले पेनाल्टी प्रहार गर्नेछन् भन्ने नयाँ बहस सुरु भएको छ । फर्नान्डेज पेनाल्टीमा असफल भएपछि रोनाल्डोले मौका पाउलान् त ? यसको जवाफ आगामी खेलले दिनेछ ।
युनाइटेडका मुख्य प्रशिक्षक सोल्स्जायर खेलअघि नै पेनाल्टी प्रहारकर्ता चयन हुने भएका कारण ब्रुनोले हानेको बताउँछन् । ‘पेनाल्टी हान्ने खेलाडी खेलअघि नै तय हुन्छ’, उनले भनेका छन्, ‘मैले फर्नान्डेजलाई नै हान्न भनेको थिएँ । उनी एक बलिया खेलाडी हुन्, एउटा पेनाल्टी मिस हुँदैमा उनलाई असर पर्दैन ।’