बितेको २४ घण्टामा नेपालका विभिन्न जिल्लामा ८३४ जनामा कोरोना भाइरसको सङ्क्रमण पाइएको छ ।

स्वास्थ्य तथा जनसंख्या मन्त्रालयले आइतबार अपरान्ह सार्वजनिक गरको विवरणअनुसार देशका विभिन्न जिल्लामा १३ हजार ७३६ जनाको नमूना परीक्षण गर्दा उक्त सङ्ख्यामा कोरोना सङ्क्रमण देखिएको हो ।

अहिलेसम्म कोरोना सङ्क्रमण देखिएकामध्ये ९६ दशमलव १८ प्रतिशत अर्थात ७ लाख ६१ हजार १५४ जना निको भएका छन् । पछिल्लो २४ घण्टामा १ हजार २७९ निको भएका हुन् ।

आज थप ९ जनाको निधन भएसँगै कोरोनाबाट ज्यान गुमाउनेको सङ्ख्या ११ हजार ९६ पुगेको छ ।

अहिले देशभर १९ हजार १४२ सक्रिय सङ्क्रमित रहेका छन् । तीमध्ये गम्भिर अवस्थाका ३६८ जनाको आइसीयू र १२० जनाको भेन्टिलेटरमा राखेर उपचार भैरहेको मन्त्रालयले जनाएको छ ।