मोरङ उर्लाबारीका सनम शाक्य हत्या प्रकरणको अनुसन्धानका क्रममा खुलेको ३८ क्विन्टल सुन तस्करी प्रकरणको मुद्दामा आजबाट अन्तिम बहस सुरु भएको छ । जिल्ला अदालत मोरङमा शाक्य हत्या तथा सुन तस्करीसँग सम्बन्धित मुद्दाको सुनुवाइ सुरु भएको हो ।
आइतबार (आज) बिहानबाट ३८ क्विन्टर सुन तस्करी प्रकरणलाई हेर्दा हेर्दैमा राखेर सुनुवाइ भइरहेको जिल्ला अदालत मोरङका सूचना अधिकारी राजेन्द्रप्रसाद धमालले जानकारी दिए । नका अनुसार यही असोज ७ गतेदेखि सुनुवाइका क्रममा रहेर मुद्दा हेर्दाहेर्दैमा राखिएको थियो ।
उनका अनुसार करिब चार वर्षअघि दर्ता भएको सो प्रकरणको अन्तिम बहस जिल्ला अदालत मोरङका न्यायाधीश भरत लम्सालको इजलासमा हुने छ ।
मोरङ उर्लाबारीका सनम शाक्य हत्या प्रकरणको अनुसन्धानका क्रममा ३८ क्विन्टर सुन तस्करी प्रकरण बाहिर आएको थियो । तस्करीको साढे ३३ किलो सुन गायब भएपछि तस्कर समूहको यातनाका क्रममा शाक्यको मृत्यु भएको थियो ।
शाक्यको २०७४ साल फागुन १८ गते मोरङको उर्लाबारी नगरपालिका–१ मा शाक्यको मृत्यु भएको थियो । शाक्यको हत्याको अनुसन्धानका क्रममा सुन तस्करीको र्याकेट पत्ता लागेको थियो ।
२०७४ माघ ९ गते त्रिभुवन अन्तर्राष्ट्रिय विमानस्थलबाट ३३ केजी सुन बाहिरिएको थियो। विमानस्थलबाट सहजै बाहिरिएको सुन बानेश्वर र एयरपोर्टको बिच बाटोबाट नै एकाएक गायब भएको थियो।
३३ किलो सुन काण्डमा सरकारले गठन गरेको विशेष छानबिन समितिले नेपालमा भएका सबैखाले सुन तस्करीमा गोरेलाई मुख्य अभियुक्त ठहराएको छ। तर, गोरे भने आफूलाई भरिया मात्र दाबी गरिरहेका छन्। उनले समितिको बयानमा नै भनेका छन् –‘म त भरिया मात्र हुँ। म भन्दा माथि अरू नै छन्।’ उनी अदालतको आदेशमा केन्द्रीय कारागार सुन्धारामा छन्।
मुद्दा दर्ता हुँदा खेरी सात प्रहरी सहित २९ जनालाई पक्राउ गरिएको थियो। त्यसपछि यस घटनामा जोडिएका अन्य मानिसहरू पक्राउ पर्ने क्रम जारी नै रह्यो। अहिले पनि यस घटनामा जोडिएका मानिस अझै फरार रहेका छन्।
यही घटनामा प्रहरीको समेत संलग्नता देखिएको भन्दै एसएसपीसम्म लाई कारबाही गरिएको थियो। तर अझैसम्म ३३ किलो सुन कहाँ गयो भन्ने पत्ता लग्न सकेको छैन।
