कञ्चनपुरको बेलडाँडीमा हजुरबुबालाई हराउँदै नाति नेपाली काँग्रेस गाउँपालिका सभापतिमा निर्वाचित भएका छन्।
गाउँ–नगरपालिका अधिवेशन अन्तर्गत शनिबार सम्पन्न निर्वाचनमा हजुरबुवा पृतबहादुर विष्टलाई ८ मतले हराउँदै गजबहादुर विष्ट सभापति बनेका हुन्। ३७ वर्षीय गजबहादुरले खसेको ८५ मध्ये ४५ मत पाएका छन्।
पराजित हजुरबुवा अन्दाजी ६० वर्षीय पृतबहादुरले ३७ मत ल्याएका छन्। जसमा ३ मत बदर भए। गाउँपालिका कार्यसमितिको सभापतिमा विजयी गजबहादुरले पृतबहादुर १३ दिने जुठो लाग्ने हजुरबुवा भएको केटिएम दैनिकसँग बताए।
बेलडाँडी गाउँपालिकामा टीकासिंह खड्का ४३ मत र ठगना राना ४० मतका साथ उपसभापतिमा निर्वाचित भएका छन्।उपसभापतिका अन्य प्रत्यासी पूर्णानन्द भट्ट र डम्बरलाल राना (दयालु) ले क्रमशः ३६ र ३१ मत ल्याएका छन्। यस्तै सचिवमा विजयी धनबहादुर रोकायाले ४२ मत पाएका छन्। अर्का विजयी सचिव कुलैराज उपाध्याय गोलाप्रथाद्वारा विजयी भएका छन्। उनले र गोला प्रथामा पराजित सचिव पदका उम्मेदवार सचिन कठायतले समान ३८ मत पाएका थिए।
अर्का प्रत्यासी रमेश चनाराले ३१ मत ल्याएका छन्। बेलडाँडी गाउँपालिका कार्यसमितिको सहसचिवमा विजयी देशुराम चौधरीले ३८ र नरेशसिंह धामीले ३७ मत ल्याएका छन्। उनका प्रतिद्वन्द्वी बसन्त रोकायाले ३४ र भुवनेश्वर पण्डितले ३१ मतमा चित्त बुझाएका छन्।