बुधबार नेपाली कांग्रेसको पदाधिकारी बैठक बस्दैछ। प्रधानमन्त्री तथा कांग्रेसका सभापति शेरबहादुर देउवाले बुधबार दिउँसो ३ बजेका लागि बैठक बोलाएका हुन्।
बैठक देउवाको निजी निवास बूढानीलकण्ठमा बस्नेछ। सरकार गठन भएको लामो समय बितिसक्दा पनि मन्त्रीपरिषदले अहिलेसम्म पूर्णता पाउन सकिरहेको छैन। अब छिट्टै नै मन्त्रीपरिषद विस्तारको तयारीमा प्रधानमन्त्री देउवा छन्।
उनले आज बोलाएको पार्टीको बैठकमा सरकारमा सहभागी हुने मन्त्रीको नाम टुंगो लगाउने बताइएको छ। देउवाले प्रधानमन्त्रीमा नियुक्त भएको ७२ दिनपछि बुधबार बल्ल एक जना मन्त्री थप्दै छन् । देउवाले डाक्टर नारायण खड्कालाई परराष्ट्रमन्त्री बनाउने र आज नै शपथ लिने तयारी गरेका छन्।
२९ असारमा प्रधानमन्त्री नियुक्त भएका देउवाले त्यही दिन चार मन्त्री नियुक्त गरेका थिए । काँग्रेसबाट बालकृष्ण खाँण गृह र ज्ञानेन्द्रबहादुर कार्की कानूनमन्त्री भएका छन् भने माओवादी केन्द्रबाट जनार्दन शर्मा अर्थ र पम्फा भुसाल उर्जामन्त्री छन् । यस्तै १० साउनमा काँग्रेस सांसद उमेश श्रेष्ठ स्वास्थ्य तथा जनसङ्ख्या राज्यमन्त्री बनेका थिए ।
मंगलबार सत्तापक्ष गठबन्धनका नेताहरुले खड्कालाई परराष्ट्रमन्त्री बनाउन सहमती जनाएका थिए। यसैगरी कांग्रेसको महाधिवेशनअन्तर्गत वडा अधिवेशन हुन बाँकी जिल्लाको अधिवेशनको नयाँ मितिका बारेमा पनि आवश्यक निर्णय हुने बताइएको छ।
प्रदेश नं २ का आठ जिल्ला तथा सुर्खेत, डोल्पा, रसुवा, रुपन्देही र कैलाली गरी १३ जिल्लाको पार्टीको क्रियाशील सदस्यता विवरण अझै सार्वजनिक हुन नसकेका कारण ती जिल्लामा यसअघिको वडा अधिवेशन कार्यतालिका प्रभावित भएको छ ।