झन्डै आठ महिनाअघिदेखि नेपाल सुरु भएको खोप अभियानमा अहिलेसम्म १८ दशमलव ३४ प्रतिशतले पूर्ण रूपमा खोप लगाएका छन् । २०७७ साल माघ १४ गते तत्कालीन प्रधानमन्त्री केपी शर्मा ओलीले नेपालमा खोप अभियानको सुरुवात गरेका थिए ।
आजसम्म स्वास्थ्य तथा जनसङ्ख्या मन्त्रालयले तथ्याङ्क हेर्ने हो भने ५५ लाख ८८ हजार ५१७ जनाले पूर्ण खोप लगाएका छन् भने ६२ लाख १५ हजार ८५६ जनाले पहिलो मात्राको खोप लगाएका छन् । हामीले केन्द्रीय तथ्याङ्क विभागले यो समाचार तयार गर्ने क्रममा राखेको नेपालको अनुमानित जनसङ्ख्या ३ करोड ४ लाख ६९ हजार ८७२ लाई आधार मानेर पूर्ण र आंशिक रूपमा खोप लगाउनेहरूको प्रतिशत निकालेका हौँ ।
स्वास्थ्य तथा जनसङ्ख्या मन्त्रालयले असोज मसान्तसम्म एक तिहाइ जनसङ्ख्यालाई खोप लगाउने लक्ष्य लिएको छ । केही दिनअगाडि चीनबाट ४४ डोज भेरोसेल खोप आएसँगै नेपालमा फेरी खोप अभियान सुरु गरिएको छ ।
सरकारले लक्षित सबै नागरिकलाई खोप लगाउने योजना तयार गरिसकेको भन्दै खोप अभियानलाई तीव्र रूपमा अघि बढाएको जनाएको छ ।
स्वास्थ्य तथा जनसङ्ख्या मन्त्रालयका अनुसार प्रदेश एकमा ७ लाख ३३ हजार ५५९ जना, दुई नम्बर प्रदेशमा ७ लाख २० हजार ९५९ जनाले खोपको पूर्ण मात्रा लगाएका छन् ।
यस्तै, बागमती प्रदेशमा १९हजार ३६ हजार १५६ जना, गण्डकी प्रदेशमा ५ लाख ९८ हजार ६१८ जना, लुम्बिनी प्रदेशमा ८ लाख ७५ हजार ७४४ जनाले खोपको पूर्ण मात्रा लगाएका छन् ।
स्वास्थ्य मन्त्रालयका अनुसार कर्णाली प्रदेशमा २ लाख ३६ हजार ३६५ र सुदूरपश्चिममा ४ लाख ८७ हजार ११६ पूर्ण खोप लगाएका छन् ।
अहिलेसम्म २० दशमलव ४० प्रतिशतले आंशिक अर्थात् पहिलो मात्राको खोप लगाएका छन् । प्रदेश १ मा ८ लाख ३८ हजार ८०९, दुई नम्बर प्रदेशमा ८ लाख ८१ हजार ३१२, बाग्मती प्रदेशमा २२ लाख ९२ हजार २१ जना गण्डकी प्रदेशमा ५ लाख ७३ हजार २१ जनाले पहिलो मात्रा लगाइसकेका छन् ।
यस्तै लुम्बिनी प्रदेशमा ८ लाख ३८ हजार ५८१ जना कर्णाली प्रदेशमा २ लाख ८८ हजार ८१० जना र सुदूरपश्चिम प्रदेशमा ५ लाख ३ हजार ३०२ जनाले खोप लगाइसकेको विवरण स्वास्थ्य तथा जनसङ्ख्या मन्त्रालयले सार्वजनिक गरेको छ ।