अश्लील फिल्मका कारोबारी राज कुन्द्राले बनाएको आगामी दुई वर्षसम्मको व्यापार योजना समेत भारतीय प्रहरीको हात परेको छ । जस अनुसार अबको दुई वर्षमा आफ्नो एपका प्रयोगकर्ता तीन गुणा र कूल नाफा ८ गुणाले वृद्धि गर्ने योजना बनाएका रहेछन् ।
उनले जम्मा ११९ वटा फिल्म बनाइसकेका थिए । यसको कलेक्सन आठ करोड ८४ लाख रुपैयाँमा उनी बेच्न चाहन्थे ।
उनको एउटा एपमाथि प्रतिबन्ध लागेपछि अर्को एप बनाएको पनि खुलासा भएको छ । उनी डिजिटल मिडियाबाट अवैध ढङ्गले पैसा कमाउन कुनै पनि कसर बाँकी नराख्ने योजनामा रहेको खुलासा भएको छ । तर, जब छानबिन हुन थाल्यो उनले धेरैजसो डेटाहरू डिलेट गरेर आफूलाई बनाउन खोजेका थिए ।
कुन्द्रा ब्रिटिश नागरिक हुन् र बलीवुडकी चर्चित नायिका शिल्पा सेट्टीका पति हुन्। उद्योगपति कुन्द्रा संसारकै सबभन्दा धनी क्रिकेट प्रतिस्पर्धा इन्डियन प्रिमियर लीगको एउटा टोलीका मालिक पनि हुन्।
गएको फेब्रुअरी महिनामा मर्डआइल्याण्डमा प्रहरीले छापा मार्दा उनको यस्तो अवैध धन्दाको खुलासा भएको हो । यस घटनामा गहना वसिष्ठसमेत जोडिएकी छिन् । राज कुन्द्राको अफिसबाट २४ वटा हाड डिस्क जफत भएका थिए । जसमा ३५ वटा यस्ता फिल्म फेला परे । अर्को एउटा कम्प्युटरमा १६ र तेस्रो कम्प्युटरमा ६० भन्दा धेरै फिल्महरू भेटिए ।
भाडामा लिइएको घरमा बनाइएका भनिएका भिडिओहरू त्यसपछि मोबाइल फोन एपहरूमा राखिएको थियो। यस्तो एपको चार लाख जति ग्राहक रहेको र उनीहरूले २०० देखि ४०० भारतीय रुपैयाँ मासिक तिर्ने गरेको बताइएको छ।
राज कुन्द्राको व्यापार योजना अनुसार सन् २०२१ मा ३१ लाख ३२ हजारभन्दा बढी रजिस्टर प्रयोगकर्ताहरू पुर्याउने र अर्को वर्ष त्यसलाई बढाएर ९८ लाख ३० हजार भन्दा धेरै पुर्याउने उनको योजना थियो । सन् २०२२ सम्ममा एक करोड ६५ लाख डलर कूल रेभिन्यु पुर्याउने योजना बनाएका राज कुन्द्रा अहिले प्रहरीको हिरासतमा छन् ।
पस्मिना सल र हिराको व्यापारः
राज कुन्द्राका पिता बालकृष्ण बेलायतका एक साधारण बस कन्डक्टरको काम गर्दथे । राज सन् १९९४ मा नेपाल आए र यहाँको पस्मिना सलले उनको भाग्य फेरिदियो ।
जब उनी नेपालबाट बेलायत फर्किए तब उनले आफूसँग कन्टेनर भरी पस्मिना सल पनि लिएर गए । उनले ती सल बेलायतका विभिन्न फेसन हाउसमा सप्लाई गरे । पहिलो वर्षमा नै उनले करिब दुई करोड पाउन्डको फाइदा कमाए ।
अब राजसँग अन्य व्यापारमा हात हाल्नका लागि पर्याप्त पैसा थियो । तर राज सल निर्यात गर्नेमा मात्रै सिमित भएनन् ।
उनले हिराको व्यापारमा हात हाले र सफल रहे । रुस, युक्रेन र संयुक्त अरब इमिरेट्सजस्ता देशमा व्यापारिक सम्भावना हेर्दै राजले उत्खनन, रियल स्टेट र अक्षय ऊर्जाको क्षेत्रमा पनि कदम राखे ।
सन् २००४ मा ‘सक्सेज’ पत्रिकाले उनलाई बेलायतको सबैभन्दा धनाढ्य एशियाली मूलका व्यक्तिको सूचीमा १९८ औं स्थानमा राखेको थियो । २९ वर्षका राज त्यतिबेला यो सूचीमा समावेश हुने सबैभन्दा युवा व्यक्ति थिए ।