सङ्खुवासभाको मादी नगरपालिका–१ उम्लिङ खोलागाउँमा भएको एकै परिवारका ६ जनाको बीभत्स हत्या प्रकरणमा थप ६ जना पक्राउ परेका छन् । मुख्य अभियुक्त लोकबहादुर कार्की र उनका भाइ नरेशबाहेक अन्य ६ जनालाई पक्राउ गरिएको प्रदेश १ प्रहरी कार्यालय विराटनगरका प्रवक्ता एसपी नवीनराज राईले केटिएम दैनिकलाई बताए ।
गत भदौ २१ गते बिहान ५३ वर्षीय तेजबहादुर कार्की, उनकी आमा ८४ वर्षीया पार्वती कार्की, पत्नी ५२ वर्षीया कमला कार्की, बुहारी ३२ वर्षीया रञ्जना कार्की, नाती ११ वर्षीय दिपेन कार्की र नातिनि ७ वर्षीया गोमा कार्की हत्या भएको थियो ।
सोही घटनाको अनुसन्धानका क्रममा मृतक तेजबहादुरका भतिजा पर्ने लोकबहादुरलाई पक्राउ गरी सफलता हात पारेको दाबी गर्दै त्यहाँबाट हिँडेको टोली पुनः घटनास्थल फर्किएको थियो ।
पछिल्लो समय तथ्य र प्रमाणका आधारमा घटनाको धेरै कुरा खुल्न थालेपछि अनुसन्धानकर्ता प्रहरी घटनास्थल पुगेर पुनः अनुसन्धान सुरु गरेको थियो । हत्या गरिएका तेजबहादुर कार्कीका चार जना छिमेकीहरूलाई शनिबार राति नियन्त्रणमा लिइ अनुसन्धान गर्दा थप ६ जना पक्राउ परेको राईले जनाए ।
‘लोकबहादुर र नरेशबाहेक अन्य ६ जना पक्राउ परेका छन्’, राईले भने, ‘आज नै उनीहरूलाई सार्वजनिक गर्ने तयारी गरिएको छ ।’ नियन्त्रणमा लिइएकाको नाम भने प्रहरीले सार्वजनिक गरेको छैन । उनीहरूलाई इलाका प्रहरी कार्यालय चैनपुर पु¥याएको बताइएको छ ।
यससँगै उक्त घटनामा पक्राउ पर्नेको सङ्ख्या आठ पुगेको छ । पक्राउ पर्नेहरूमा लोकबहादुर, उनका भाइ नरेश, बुबा रणबहादुर, छिमेकी खड्गबहादुर कार्की र उनका दुई छोरा र श्रीमती रहेको प्रहरी स्रोतले जनाएको छ । तीमध्ये चार जनालाई आज सार्वजनिक गरिने स्रोतको भनाइ छ ।