आइसिसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तर्राष्ट्रिय सिरिजमा नेपालले घरेलु टिम ओमानविरुद्ध जित सहज निकालेको छ । आइतबार ओमानको अल अमेरत क्रिकेट मैदानमा नेपालले सात विकेटको जित निकालेको हो ।
ओमानले दिएको एक सय २२ रनको लक्ष्य पछ्याएको नेपालले १८ दशमलव दुई ओभरमा मात्र तीन विकेटको क्षतिमा पूरा गरेको हो । नेपालका लागि कप्तान ज्ञानेन्द्र मल्ले अर्धशतक प्रहार गरे । उनले अजिवित ५२ रन जोडे ।
यस्तै, आसिफ शेखले ४० रन बनाए । उनले ४४ बल खेल्दा सात चाैका प्रहार गरे । कुशल भुर्तेलले ६ रन जोडे ।
ओमानका नेस्टर धम्बाले दुई तथा कालिमुल्लाहले एक विकेट झारे ।
त्यसअघि नेपालले टस जितेर पहिला बलिङ गर्ने निर्णय लिएसँगै ब्याटिङमा उत्रिएको ओमानले ३७ दशमलव एक ओभरमा अलआउट हुँदै एक सय २१ रन बनाएको थियो ।
ओमानका लागि जिसन मक्सुदले ४१ रन जोडे भने ओपनर जतिन्दर सिंहले १३ रन र नसीम खुसीले १२ रन बनाए । यस्तै, कलिमुल्लाहले ११ रन जोडे भने ओमानका अरू ब्याट्सम्यानले दोहोरो अङ्कमा रन जोड्न पाएनन् । बलिङमा नेपालका करण केसी र सन्दीप लामिछानेले चार–चार विकेट लिए ।
यसअघि सोमबार भएको पहिलो खेलमा नेपालले अमेरिकालाई पाँच विकेटले पराजित गरेको थियो । त्यस्तै, मङ्गलबार भएको दोस्रो खेलमा भने नेपाल ओमानविरुद्ध पाँच विकेटले पराजित भएको थियो । शुक्रबार भएको अमेरिकाविरुद्धको दोस्रो खेलमा नेपाल ६ विकेटले पराजित भएको थियो ।