सङ्खुवासभाको मादी नगरपालिका–१ उम्लिङ खोलागाउँमा भएको एकै परिवारका ६ जनाको बीभत्स हत्या प्रकरणको अनुसन्धानका लागि अनुसन्धानकर्ताको टिम पुनः घटनास्थल फर्किएको छ । हत्या आरोपमा मृतक तेजबहादुर कार्कीका भतिजा पर्ने लोकबहादुर कार्कीलाई पक्राउ गरी सफलता हात पारेको दाबी गर्दै त्यहाँबाट हिँडेको टोली पुनः घटनास्थल फर्किएको हो ।
हत्या आरोपी पक्राउ परेपछि अनुसन्धानको नेतृत्व गरिरहेका सङ्घीय इकाई प्रहरी कार्यालय धरानका एसपी भीमबहादुर दाहालसहितको टिम ‘मिसन कम्प्टिल’ भएको भन्दै २६ गते घटनास्थलबाट बाहिरिएको थियो ।
प्रदेश १ का डिआइजी अरुणकुमार बिसीले मादी नगरपालिका–१ खोलागाउँमा भएको घटना अनुसन्धानका लागि सङ्घीय प्रहरी इकाई कार्यालय धरानबाट प्रहरी उपरीक्षक भीम दाहालको नेतृत्वको टोली गठन गरेका थिए । अनुसन्धानका लागि डिआइजी बिसी पनि खटिएका थिए । पाँच दिनको प्रयासपछि हत्या आरोपी पक्राउ परेको भन्दै त्यहाँबाट बिदा भएको टिम पुनः घटनास्थल फर्किएको प्रदेश १ प्रहरी कार्यालय विराटनगरका प्रवक्ता एसपी नवीनराज राईले बताए ।
उनका अनुसार सङ्खुवासभा प्रहरी प्रमुख डिएसपी लालध्वज सुवेदी पनि घटनास्थल पुगेका छन् । पछिल्लो समय तथ्य र प्रमाणका आधारमा घटनाको धेरै कुरा खुल्न थालेपछि अनुसन्धानकर्ता प्रहरी घटनास्थल पुगेर पुनः अनुसन्धान सुरु गरेका हुन् ।
घटनास्थल पुगेको टोलीले हत्या गरिएका तेजबहादुर कार्कीका चार जना छिमेकीहरूलाई शनिबार राति नियन्त्रणमा लिएको छ । नियन्त्रणमा लिइएकाको नाम भने प्रहरीले सार्वजनिक गरेको छैन । उनीहरूलाई इलाका प्रहरी कार्यालय चैनपुर पु¥याएको बताइएको छ । चार जनालाई सोधपुछ र अनुसन्धानका लागि नियन्त्रणमा लिइएको पुष्टि एसपी राईले गरेका छन् ।
मुख्य आरोपी मानिएका लोकबहादुरका भाइ नरेश कार्की यसअघि नै पक्राउ परिसकेका छन् । तर प्रहरीले भने विज्ञप्ति जारी गरेर पक्राउ नगरिएको दाबी गरेको छ । अदालतबाट पक्राउ पूर्जी जारी नगरी नियन्त्रणमा लिइएका कारण उनका बारेमा प्रहरीले बताउन नचाहेको हुनसक्ने आशङ्का गरिएको छ ।
हत्या गरिएकीमध्ये रञ्जना कार्कीको मोबाइल लुकाएर राखेको पाइएपछि लोकबहादुरका भाइ नरेशलाई प्रहरीले नियन्त्रणमा लिएर छानबिन एवम् सोधपुछ गरिरहेको हो । नरेशलाई नियन्त्रणमा लिएर सोधपुछ गर्न थालेपछि घटनाका बारेमा केही नयाँ तथ्य बाहिर आएकाले अरु चार जनामाथि पनि प्रहरीले अनुसन्धान केन्द्रित गरेको हो । घटनाको अनुसन्धानका लागि १० जनाको प्रहरी टोली भने घटनास्थलमै रहेको थियो ।
गत भदौ २१ गते बिहान ५३ वर्षीय तेजबहादुर कार्की, उनकी आमा ८४ वर्षीया पार्वती कार्की, पत्नी ५२ वर्षीया कमला कार्की, बुहारी ३२ वर्षीया रञ्जना कार्की, नाती ११ वर्षीय दिपेन कार्की र नातिनि ७ वर्षीया गोमा कार्की हत्या भएको थियो ।