नेकपा (एमाले) बाट विभाजनपछि सुदूरपश्चिम प्रदेशसभाको सबैभन्दा ठुलो दल बनेको नेकपा (एकीकृत समाजवादी)ले मुख्यमन्त्री त्रिलोचन भट्टलाई नै निरन्तरता दिने पक्षमा देखिएको छ । सभामुखसहित ५२ जना रहेको सुदूरपश्चिम प्रदेशसभामा नेकपा (एस) मा १४, नेकपा माओवादी केन्द्र १३, नेपाली काँग्रेस १२, नेकपा एमाले १० र जसपा २ जना सांसद भएका छन् ।
पार्टी विभाजनअघि मुख्यमन्त्री फेर्नु पर्ने बताउँदै आएका समाजवादी पार्टीमा सम्मिलित सांसदहरू नै नयाँ पार्टी गठन गरेपछि भने मुख्यमन्त्रीमा भट्टलाई नै निरन्तरता दिने पक्षमा देखिएका हुन् ।
समाजवादी पार्टीकी केन्द्रीय सदस्य एवं प्रदेश सरकारकी प्रवक्ता आन्तरिक मामिला तथा कानुन मन्त्री पूर्णा जोशीले मुख्यमन्त्री भट्टलाई फेर्ने पक्षमा आफूहरू नरहेको बताइन् । उनले नेपाली काँग्रेसलाई सरकारमा सहभागी गराउने विषयमा पनि आफूहरूबिच छलफल नभएको बताइन् ।
पार्टी दर्ताका क्रममा सुदूरपश्चिमको मुख्यमन्त्री पद आफ्नो पार्टीले पाउनु पर्ने बताएका समाजवादीका नेताहरूले अहिले भने मुख्यमन्त्री पदमा दाबी गर्न छाडेका छन् । एकीकृत समाजवादीका तर्फबाट दीर्घ सोडारीले मुख्यमन्त्रीमा दाबी गरेका थिए । उनलाई मंगलवार पार्टीले संसदीय दलको नेता चयन गरेको छ ।
श्रोतका अनुसार शक्तिशाली मन्त्रालय लिएर एकीकृत समाजवादीले मुख्यमन्त्रीमा माओवादीका भट्टलाई नै निरन्तरता दिने रणनीति लिएको छ ।