आइसिसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तर्राष्ट्रिय सिरिजको दोस्रो खेलमा नेपालले ओमानसँग खेलिरहेको छ । ओमानको राष्ट्रिय क्रिकेट एकेडेमीको अल एमिरात क्रिकेट ग्राउन्डमा जारी खेलमा नेपालले ओमानसामु एक सय ९७ रनको लक्ष्य प्रस्तुत गरेको छ ।
टस जितेर पहिले ब्याटिङमा उत्रिएको नेपालले ४७ दशमलव ४ ओभरमा अलआउट हुँदै एक सय ९६ रन बनायो । नेपालका लागि आरिफ शेखले ९० रनको अर्धशतकीय इनिङ्ग्स खेले । उनले एक सय २१ बलमा सात चौका र एक छक्का प्रहार गरे ।
यस्तै, कप्तान ज्ञानेन्द्र मल्लले ३३ बलमा २१ रन जोड्दा करण केसीले ४८ बलमा २१ रन बनाए । रोहितकुमार पौडेलले ३४ बलमा २० रन बनाए भने सन्दीप लामिछानेले २६ बल खेल्दा १६ रन जोडे ।
सोमपाल कामीले सात, विनोद भण्डारीले ६, कुशल मल्लले चार र विक्रम सोबले दुई रन बनाए भने सुशन भारीले अजिवित दुई रन जोडे । कुशल भुर्तेल भने शून्य रनमा पेभेलियन फर्किए ।
बलिङतर्फ बिलाल खानले चार विकेट लिए भने नेस्टर धाम्बाले दुई तथा मोहम्मद नदीम र जिसन मकुबले एक-एक विकेट झारे ।
यसअघि सोमबार भएको पहिलो खेलमा नेपालले अमेरिकालाई पाँच विकेटले हराएको थियो । ओमान लिग–२ को शीर्ष स्थानको टिम हो । उसले १० खेलमा १६ अङ्क जोडेको छ । नेपाल पाँच खेलमा ६ अङ्क जोडेर छैटौँ स्थानमा रहेको छ ।