सङ्खुवासभाको मादी नगरपालिका–१ उम्लिङ (खोलागाउँ) को सामूहिक हत्या प्रकरणमा प्रहरीले स्थानीय एक युवालाई पक्राउ गरेको छ । कार्की परिवारको हत्यामा संलग्न रहेको आरोपमा प्रहरीले छिमेकी २६ वर्षीय लोकबहादुर कार्कीलाई पक्राउ गरेको हो ।
पक्राउ पर्ने कार्कीले आफैँले ६ जनाको हत्या गरेको स्वीकारेको अनुसन्धानमा संलग्न एक प्रहरी अधिकारीले जानकारी दिए । कार्कीले ब्यक्तिगत रिसिइबीका कारण ठुलोबुबा पर्ने ५२ वर्षीय तेजबहादुर कार्कीलाई मारेको स्वीकारेको प्रहरीले जनाएको छ ।
तेजबहादुरले आफूलाई पटकपटक हेपेर बोल्ने र त्यस्तै ब्यवहार गरेकोले ज्यान लिएको कार्कीले स्वीकार गरेको प्रहरीले जनाएको छ । तेजबहादुरको हत्या गर्ने क्रममा अरू सदस्यहरू पनि आएपछि सबैको हत्या गरेको उनले स्वीकारेका हुन् । उनले आफ्नै काकी हजुरआमा पर्ने ८४ वर्षीया पार्वता, ठुलीआमा ५२ वर्षीया कमला, भाउजु ३२ वर्षीया रञ्जना, भतिजा ११ वर्षीय दीपेन र भतिजी ७ वर्षीया गोमा कार्कीको हत्या गरेको स्वीकारेको प्रहरीले जनाएको छ ।
उनले बाटोमै टाउको पछाडिबाट हिर्काएर तेजबहादुरको हत्या गरेको खुलेको प्रहरीले बताएको छ । अनुसन्धानमा संलग्न एक अधिकृतका अनुसार लोकबहादुरले आफूले तेजबहादुरलाई मात्र मार्न चाहेको बयान दिएका छन् । तर घरका अन्य सदस्य पनि आएपछि अरुलाई पनि मार्न बाध्य भएको भनेका छन् ।
कराउन थालेपछि आत्तिएका उनले घरतिर समेत गएर सबैको हत्या गरेको साबिती बयान दिएको प्रहरीले जनाएको छ ।सोमबार बिहान ८ः३० बजेतिर स्थानीयले यत्रतत्र शवहरू देखेपछि जनप्रतिनिधिको सहयोगमा प्रहरीलाई खबर गरेका थिए ।
को हुन लोकबहादुर ?
जिल्ला प्रहरी कार्यालय, संखुवासभाका अनुसार मृतक तेजबहादुर दुई सय मिटर मास्तिरका भतिजो नाता समेत पर्छन् । लोकबहादुरको बुबा साहिँलाको छोरा हुन् भने मृतक तेजबहादुर कान्छाका छोरा हुन् । लोकबहादुरले कक्षा ८ सम्म पढेपछि पढ्न छोडेको मृतकका भतिजामध्येका एक विनोद कार्कीले जानकारी दिए । उनका अनुसार घरमा पनि उत्ति काम नगर्ने कार्की मलेसिया र कतार काम गर्न गए पनि वर्षदिन नपुग्दै फर्किएर गाउँमा बस्दै आएका थिए ।
६ वर्ष अगाडि मलेसिया गए पनि १० महिनामा आफू विदेश जाँदाको ऋणसमेत नतिरी फर्किएको उनको भनाइ छ । त्यसको डेढ वर्षपछि पुनः वैदेशिक रोजगारीको लागि कतार पुगे नौ महिना नपुग्दै घर फर्किएका थिए । कार्की कहिले राति घर बास नआउने, कहिले राति घरबाट हराउने, गाउँका बेकामे केटाहरुसँग बिना काम डुलिहिँड्ने जस्ता ब्यवहार गर्दै आएका थिए ।
कार्कीले केटिएम दैनिकसँग भने, ‘लोकबहादुरले बयान दिएजस्तो ती काका (मृतक तेजबहादुर) कसैलाई केही भन्ने हेप्ने स्वभावका थिएनन् । अनि मलाई जहाँसम्म लाग्छ, लोकबहादुरले एक्लैले यो हत्या गर्न सम्भव नै छैन ।’
गत चैत २६ गते आमा बितेपछि बुबा र भाइसहित तीन जनाको परिवारमा लोकबहादुर बस्दै आएका थिए । आमा डेढ वर्षअगाडि तेजबहादुरको घरमा लडेर बेहोस भएकी थिइन् । उपचारको क्रममा झापामा आमाको मृत्यु भएपछि लोकबहादुरले आमाको मृत्युको कारण पनि तेजबहादुर नै भएको आरोप लगाउँदै आएका थिए ।
हत्याको खबर छिमेकीलाई लोकबहादुरले नै दिएका थिए । लोकबहादुरको घरमा रगत लागेको कपडा र हत्यामा प्रयोग गरिएको जस्तो देखिने हतियारहरू प्रहरीले फेला पारेपछि उनलाई केन्द्रविन्दुमा राखेर अनुसन्धान गरेको थियो । घटनाको विवरण र संलग्नलाई भोलि (आइतबार) प्रहरीले चैनपुरमा पत्रकार सम्मेलन गरी सार्वजनिक गर्ने बताएको छ ।
केटीले धोका दिएपछि बहुलाएका थिए उनी
लोकबहादुर दुईपटक बहुला भएका थिए । उनले करिब एक वर्ष अगाडिसम्म मानसिक रोगको औषधि सेवन गरिरहेका थिए । ‘केटीले धोका दिएपछि लोक बहादुर दुई पटक बहुलाएर हिँडेको थियो । विदेश गएका बेला कुन केटीलाई पैसा पठाउँदो रहेछ । पछि नेपाल फर्किँदा केटी सम्पर्कविहीन भएपछि बहुलाएको हो,’ मृतकका आफन्तले भने, ‘पछि आफैँ ठिक भएको सुनेको थिएँ । लामो समयदेखि ठिकै थियो । पछि आमाको हत्याको कारण तेजबहादुर हो भन्दै आक्रोश व्यक्त गरिरहन्थ्यो ।’