पछिल्लो आर्थिक वर्ष २०७७/७८ मा मोरङमा एक हजारभन्दा बढी सवारीसाधन दुर्घटनामा परेका छन् । जिल्ला ट्राफिक कार्यालय मोरङको तथ्याङ्कअनुसार जिल्लामा एक हजार एक सय ३० सवारी दुर्घटना भएको छ । अघिल्लो वर्षको तुलनामा यो ६ सय ४३ ले बढी हो ।
२०७६/७७ मा मोरङमा चार सय ८७ सवारीसाधन दुर्घटनामा परेका थिए । झन् कोरोना महामारीका कारण जारी बन्दाबन्दीमा सवारी साधनको दुर्घटना बढेको जिल्ला ट्राफिक कार्यालय मोरङका प्रमुख चन्द्रबहादुर खड्काले जानकारी दिए । उनका अनुसार मोरङमा एक वर्षमा सवारी दुर्घटनाबाट एक सय ४८ जनाको मृत्यु भएको भने एक हजार तीन सय ५९ जना घाइते भएका छन् ।
मृत्यु हुनेको सङ्ख्या अघिल्लो आर्थिक वर्षको तुलनामा ५९ ले बढी हो । अघिल्लो वर्ष दुर्घटनाका कारण ८९ जनाले ज्यान गुमाएका थिए । आर्थिक वर्ष ०७५/७६ मा चार सय ८४ सवारी दुर्घटना हुँदा एक सय पाँच जनाको ज्यान गएको थियो । तीन वर्षको तथ्याङ्कलाई विश्लेषण गर्ने हो भने आर्थिक पछिल्लो एक वर्ष दुर्घटनाबाट मृत्यु हुनेको सङ्ख्या बढी देखिएको ट्राफिक प्रहरी प्रमुख खड्काको भनाइ छ ।
आर्थिक वर्ष २०७७/७८ मा दुर्घटनामा एक हजार सात सय २३ सवारीको संलग्नता पाइएको छ, जसमध्ये सबैभन्दा बढी मोटरसाइकलको संलग्नता रहेको पाइएको छ । पछिल्लो एक वर्षमा एक हजार ५६ मोटरसाइकल दुर्घटनाको कारक बनेका छन् । दुर्घटनाका कारण उक्त अवधिमा २ चौपायको मृत्यु भएको छ ।
आर्थिक वर्ष २०७७/७८ मा सवारीसाधन दुर्घटना हुने सङ्ख्यामा उल्लेख्य वृद्धि हुनुमा अभिलेखीकरण पनि प्रमुख कारण भएको ट्राफिक प्रहरी प्रमुख खड्काको भनाइ छ । उनका अनुसार अघिल्ला वर्षहरूमा गम्भीर प्रकृतिका दुर्घटनामात्र अभिलेख गरिएको र यस वर्ष सबैखाले दुर्घटनाको टिपोर्ट गरिएका कारण सङ्ख्या बढी देखिएको उनले बताए ।
पछिल्लो समय सवारी साधनको आयात तथा वृद्धिमा उल्लेख्य विस्तार भइरहेको छ । तर सडक विस्तार नभएका कारणले पनि सवारी दुर्घटना बढेको जिल्ला ट्राफिक कार्यालय मोरङका सई शिवकुमार शर्माले बताए । कोरोना महामारीका कारण निजी सवारी साधन प्रयोगकर्ताको सङ्ख्या बढेका कारण पनि सवारी दुर्घटना उल्लेख्य मात्रामा बढेको उनले बताए । यस्तै तीनपाङ्ग्रे सवारीसाधनको वृद्धि भएपनि ट्राफिक ज्ञानको अभावमा दुर्घटना बढिरहेको उनको भनाइ छ ।
कारवाही र राजश्व सङ्कलनमा पनि वृद्धि
सवारी दुर्घटना र त्यसमा ज्यान गुमाउनेको सङ्ख्या बढेजस्तै कारवाही र राजश्व सङ्कलनमा पनि वृद्धि भएको जिल्ला ट्रापिक कार्यालय मोरङले जानकारी दिएको छ । उनका अनुसार २०७७/७८ मा मात्र ७० हजार एक सय २५ सवारीसाधन कारवाहीमा परेका छन् भने त्यसबाट चार करोड २० लाख ६३ हजार राजश्व सङ्कलन भएको तथ्याङ्कमा उल्लेख छ ।
त्यसमा पनि सबैभन्दा धेरै मोटरसाइकल कारवाहीमा परेका छन् । उक्त अवधिमा १९ हजार ५५ मोटरसाइकल कारवाहीमा पर्दा एक करोड १८ लाख ९४ हजार राजश्व सङ्कलन भएको थियो । २०७६/७७ मा भने ४२ हजार दुई सय नौ सवारी कारवाहीमा पर्दा तीन करोड १९ लाख ९५ हजार पाँच सय राजश्व सङ्कलन भएको छ ।