नेकपा एमालेका उपमहासचिव विष्णु पौडेलले अमेरिकी परियोजना मिलेनियम च्यालेन्ज कर्पोरेसन (एमसीसी) संसदमा टेबल भएपछि राष्ट्रको हितलाई केन्द्रमा राखेर तत्काल निर्णय गर्ने बताएका छन् ।
बुधबार बुटवलमा प्रेस चौतारीद्वारा आयोजित कार्यक्रममा एमसीसी लागू हुनुपर्ने धारणा राख्दै सुरुमा एमसीसी संसद टेबल हुनुपर्ने र त्यसपछि पार्टीले राष्ट्रको हितअनुकूल निर्णय गर्ने उनले बताए ।
उनले भने, ‘पहिले यो विषय संसदमा आओस् न, हामी राष्ट्रको हितलाई केन्द्रमा राखेर तत्काल निर्णय गर्छौं । बरु सरकार नै यसबारेमा रंगिबिरंगी भएर समस्या उत्पन्न भएको छ ।’
साथै, एमाले र दलहरुबीच एमसीसीबारे एकमत नहुनुमा समस्या भएको उनको भनाइ थियो । एमाले उपाध्यक्ष भीम रावल एमसीसी नेपालमा आए भारतसँग गरिएको सन्धिझैँ नेपालीले भूभाग गुमाउनुपर्ने दिन आउने बताउँदै आएका छन् ।
बुधबार बुटवलमा प्रेस चौतारीले आयोजना गरेको पत्रकार सम्मेलनमा पौडेलले जुन पार्टीबाट पद, प्रतिष्ठा पाएको छ, त्यसलाई नै माधवकुमार नेपालले बन्चरो हान्ने काम गरेको टिप्पणी गरे ।
उनले पार्टी विभाजनलाई ‘पानीका फोका’सँग तुलना गरे । उनले भने, ‘विभाजन भएको होइन, यो त पानीको फोकाजस्तै हो, धेरै दिन टिक्दैन ।’ लुम्बिनीमा एमाले विभाजित नभएको दाबी गर्दै उनले नेकपा एकीकृत समाजवादीमा गएकाहरुलाई पनि एमालेमै फर्कन आग्रह गरे ।
सर्पले काँचुली फेरेजस्तै एमालेभित्र पनि अग्रगामी काम रोक्ने व्यक्तिहरु पार्टीको मूल प्रवाहबाट अलग्गिएको पौडेलको भनाइ छ ।
