नेकपा एमालेका उपाध्यक्ष भीम रावल अमेरिकी सहयोग परियोजना मिलेनियम च्यालेन्ज कर्पोरेशन (सीसीएमसी) राष्ट्रघाती सम्झौता भएको बताएका छन् ।
शनिबार काठमाडौँमा अछाम जिल्लाका एमाले नेता तथा कार्यकर्ताहरूको छलफल कार्यक्रममा बोल्दै उपाध्यक्ष रावलले जसरी एमसीसी सम्झौतालाई अस्थिर राजनीति भएको बेलामा अघि सारियो त्यसरी नै अहिले राजनीतिक अस्थिरता भएको बेलामा संसद्बाट अनुमोदन गर्ने षड्यन्त्र भइरहेको बताए ।
‘एमसीसी राष्ट्रघाती सम्झौता हो । मैले भने मलाई गिरफ्तार गर्नुस्,’ उनले कार्यक्रममा भने, ‘यो लोकतन्त्र हो कि शेरबहादुरजीले अर्कै तन्त्र ल्याइसक्नु भयो । मन्त्रिपरिषद्ले पूर्णता पाएको छैन, ५० दिन भयो अझैँ मन्त्रिपरिषद् पूरा भएको छैन । लाज पनि मान्नुपर्ने । उहाँले एमसीसीको बारेमा बोलेपछि जेल चलान गरिनेछ, म प्रधानमन्त्री देउवालाई च्यालेन्ज गर्छु–एमसीसी राष्ट्रघाती सम्झौता होइन गिरफ्तार हुन तयार छु ।’
प्रधानमन्त्री शेरबहादुर देउवाले एमसिसीको उपाध्यक्षलाई नेपाल बोलाएर नेताहरूको घरघरमा पुर्याउन लागेको पनि बताए । उनले एमसिसी पास गरेर देशलाई उपनिवेश बनाउन लागेको भन्दै त्यसका विरुद्धमा आवाज उठाउन पनि नेता, कार्यकर्तालाई आह्वान गरे । उनले भने ‘झिलिमिली’ हुन्छ यो देश भनेर जनतालाई भ्रम छरेर नेपाललाई उपनिवेशीकरणको बाटोमा पुर्याइँदै छ ।
एमसिसी सम्झौता असमान भएको र सार्वभौमिक समानताको सिद्धान्तअनुरूप नभएको उनले बताए । एमसिसीको कतिपय प्रावधानले नेपालको आत्मनिर्णयको अधिकार र स्वाधीनतामाथि हमला गर्ने पनि उनले बताए । एमसिसीको सम्बन्धमा नेपालका रेडियो तथा टेलिभिजनबाट विज्ञापन बजाएर राष्ट्रकै अपमान गरिएको उनको तर्क छ ।
एमसीसी नेपालमा आए देश उस्कै अधीनमा हुने र देश भारतसँग सन् १९५० मा गरिएको सन्धिजस्तै कब्जा हुने पनि उनले बताएका छन् । भारतसँग सन् १९५० मा सन्धि गरेपछि भारतले नेपालको भूमि कब्जा गरेको र जुन अहिलेसम्म फिर्ता नभएको भन्दै एमसीसी पनि त्यस्तै रहेको उनको भनाइ छ ।
‘मिलिनियम च्यालेञ्ज कर्पोरेसनको स्वामित्व हुने, उसको अधीनमा हुने भन्ने छ। भोलि नेपाल सरकारले त्यो प्रसारण लाइनमा मर्मत गर्नुपर्यो भने गर्न सक्दैन। एमसीसीको अनुमति लिनुपर्छ। अनि नेपालको भूमि विदेशी कब्जामा गएन ? सन् १९५० को सन्धि नेपाली भूमिमा भारतीय कब्जा हो । जुन अहिले नेपालको अधीनमा छैन। एमसीसी पनि त्यस्तै हो।’
नेता रावलले सम्झौताअनुसार गइएको अवस्थामा नेपालमा अमेरिकी कानुन पूर्ण मान्नुपर्ने बताउदै नेपालमा अमेरिकी सेनाको खटनमा राज चल्ने पनि उनले सुनाए । उनका अनुसार सम्झौतामा नेपालको कानुनभन्दा माथि हुने, अमेरिकी संघीय कानुन मान्नुपर्ने भनेको छ र अमेरिकाले भविष्यमा नेपालमा सेना राख्नुपर्छ भन्ने कानुन बनायो भने त्यो नेपालले मान्नुपर्छ।
यसो भएको अवस्थामा नेपालको स्वतन्त्रता नहरने भन्दै उनले अहिले सत्तामा बस्नेहरु यो सम्झौता पास गराउन टाउको फोडेर लागिपरेको पनि आरोप लगाएका छन् ।